د لاسرسي ځای

تازه خبر

ډاکټران وايي د بلوجستان په سرکاري روغتونو کې هیڅ اسانتیاوې نشته


د کوټې د روغتون پخوانی عکس

د بلوچستان په زیاترو روغتونونو کې د دوایانو د نیشتوالي او پر ډاکټرانو د تشدد د پېښو پرضد د اپرېل پر شپږمه هم د کوټې په ګډون د صوبې په زیاترو سرکاري روغتونو کې کاربندیز شوی دی.

د دې کار بندیز غوښتنه د بلوچستان د ډاکټرانو د بیلا بیلو ټولنو اتحاديې - ډاکټر ایکشن کمیټۍ – کړې وه.

د دې کاربندیز له کبله په روغتونونو کې د ناروغانو د علاج چارې او د عملیاتو څانګې هم بندې ساتل شوې وې چې له کبله یې ناروغان او د هغوي خپلوان له ستونزو سره مخامخ وو.

پر دې مهال د کوټې په بولان میډیکل کمپلیکس کې یو احتجاجي لاریون هم را اېستل شوی وو چې د خپلو غوښتنو لپاره یې شعارونه ورکول.

په لاریون کې د شریکو ډاکټرانو وینا وه چې په سرکاري روغتونونو کې د حکومت له خوا نه دوایاني شته او نه هم د ناروغانو لپارهنوري اسانتیاوې برابرې شوې دي.

دوي وویل چې له دې کبله هلته ګمارل شوي ډاکټران د ناروغانو په سمه توګه علاج نشي کولای.

د ځوان ډاکټرانو ټولنې یو غړي ډاکټر عصمت نور مشال راډیو ته وویل چې په روغتونونو کې د سهولتونو د نیشتوالي له کبله د ناروغانو خپلوان د هر څه پړه پر ډاکټرانو اچوي.

ډاکټر عصمت نور وویل چې دا د صحت د وزیر او د صحت د محکمې کار دی چې په روغتونونو کې مناسب سهولتونه ورکړي.

د یادې اتحادې یو بل غړې ډاکټر عبدالحسیب وايي له تیر یو کاله پر ډاکټرانو نه یوازې بریدونه شوي بلکې د هغوي د تښتولو پېښې هم رامنځ ته شوې دي.

د بلوچستان د روغتیا وزیر نصیب الله مري مشال راډیو ته وویل چې دې ډاکټرانو په ناقانونه توګه کار بندیز کړی دی.

د ده په وینا دا ځکه چې حکومت له وړاندې دوي ته تسلي ورکړې ده چې د اپرېل پر اتمه به د اسمبلۍ په غونډه کې به د ډاکټرانو د حفاظت لپاره د نوي قانون د مسودې منظوري ورکړي.

XS
SM
MD
LG