دا جرګه له تیرو څلورو ورځو روانه وه چې پکې له ډیره اسماعیل خان څخه هم قبایلي مشرانو ګډون کړی وو.
جرګې غوښتنه کړی ده چې په خیسور کې د پوځي عملیاتو پر وخت د کورونو د بې پردګۍ د تورونو پلټنې دې وشي او ذمه وارو کسانو ته دې سزا ورکړل شي.
په دغه اړه د جرګې یو مشر ملک نصرالله خان نن مشال ریډیو ته وویل چې پوځ به په دې پېښه کې ککړ کسان سزا کوي.
نوموړي وویل چې پوځ به په سیمه کې د تلاشۍ لپاره په خپل سر کورونو ته نه ننوځي بلکې د کلي د زمه وارو کسانو په موجودګي کې به د مشکوک کور تلاشي کوي.
د حکومت او پوځ له خوا د جرګې د پرېکړې په اړه لا هم رسمي غبرګون مخې ته نه دی راغلی.
دا له هغه وروسته ده چې پر سوشل میډیا د یو ماشوم حیات خان د ویډیو تر خپریدو وروسته احتجاجي مظاهرې راپاریدلې وې.
جرګه به د فرورۍ پر څلورمه نیټه بیا په ډیره اسماعیل خان کې راغونډیږي چې پکې به د راتلونکي وخت لپاره پر حکمت عملۍ خبرې کیږي.
دا جرګه له هغه وروسته را وبلل شوه چې پښتون ژغورنې غورځنګ د جنورۍ پر شلمه په شمالي وزیرستان کې د دې پېښې پرضد لویه احتجاجي غونډه وکړه.
