د لاسرسي ځای

تازه خبر

خبرونه

پر ډیورنډ کرښه د ازغن تار غځولو نیمی کار بشپړ شوی: کرنل شهزاد

پر ډیورنډ کرښه د ازغن تار غځول.

د پاکستان امنيتي چارواکي وايي، له ډیورنډ کرښې سره د ازغن تار غځولو نيم کار يې مکمل کړی دی.

په شمالي وزيرستان کې د ملېشو ځواکونو يو لوړي پوړي چارواکي کرنل شهزاد د ډېسېمبر پر پینځمه په غلام خان بندر کې د سيمې له خبريالانو سره د خبرو په وخت وویل چې دواړه خواو ته د اوسېدونکو د تګ راتګ لپاره به ځانګړې دروازې جوړوي.

کرنل شهزاد دغه تار په دوستانه تار یا باړ یاد کړ او وې ویل چې دې سره به دواړه خواو ته د غیر قانوني تګ راتګ مخه ونیول شي.

پوځي چارواکي وویل چې د افغانستان پاکستان ترمینځ په نېږدې ۲۴۰۰ کلومیټره اوږده پوله د ازغن تار لګولو سره سره يې امنیتي قلعې هم جوړې کړي دي.

د مشال راډيو اېپ د ښکته کولو طريقه
تم شئ

هېڅ میډیايي سرچینه اوس نشته

0:00 0:01:08 0:00

د نننۍ ورځې ټول خبرونه وګورئ

افغانستان کې دوه امريکايي پوځيان وژل شوي

افغانستان کې د امريکايي پوځيانو موتړ (ارشيف)

پراګ - په افغانستان کې د ناټو په مشرۍ د غوڅ ملاتړ ماموریت ویلي چې د دوی دوه امریکایي پوځیان په دغه هېواد کې وژل شوي دي.

د غوڅ ملاتړ ماموريت د اګست پر ۲۱مه په یوه بیان کې ویلي چې دوه امریکایي سرتیرې د چارشنبې په ورځ (د اګست پر ۲۱مه) په افغانستان کې وژل شوي دي خو د دغو پوځیانو د شناخت په اړه یې نور معلومات نه دي ورکړي او دا هم نه دي ویل شوي چې دا عسکر چیرته وژل شوي دي.

دا په داسې حال کې ده چې امریکا د طالبانو له استازو سره د قطر په دوحه کې يو ځل بيا د سولې مذاکرات پيلوي . په افغانستان کې دا وخت شاوخوا ۱۴۰۰۰ امریکایي عسکر موجود دي چې زیاتره یې افغان امنیتي عسکرو ته روزنه ورکوي.

خوست: یو کس د کورنۍ د غړو تر وژنې وروسته ځانوژنه کړې

د خوست په تڼیو ولسوالۍ کې یوه کس د خپل پلار، مور او خور تر وژنې وروسته خودکشي کړې ده.

د امنیه قوماندانۍ ویاند حیدر عادل مشال راډیو ته وویل، پېښه د اګست پر ۲۱مه سهار شوې.

دی وايي، لومړنۍ موندنې ښيي چې پېښه د کورنیو ستونزو له کبله شوې.

د تڼیو د لغوړي یوه اوسېدونکي د نوم نه ښودو په شرط مشال راډيو ته وویل، دا پېښه په کور کې د جنجال له وجې شوې چې پکې د هغه کس یو ورور هم ژوبل شوی چې اوس په روغتون کې دی.

پولیسو په پېښه کې د وژل شویو او ژوبل کس نوم نه دی اخیستی.

د امریکا د بهرنیو چارو وزیر یو ځل بیا ایران په ترهګرۍ تورن کړ

د امریکا د متحدو ایالتونو د بهرنیو چارو وزیر مایک پامپیو

د امریکا د متحدو ایالتونو د بهرنیو چارو وزیر مایک پامپیو د اګست پر ۲۰مه، د ملګرو ملتونو د امنیت شورا غونډې ته، چې د منځني ختیځ د سولې او پر امنیتي چلنچونو بحث ته ځانګړې شوې، په مشخص ډول د ایران نوم واخیست او هغه هېواد یې د ترهګرۍ په تور، تورن کړ.

پامپیو وویل، تهران او نیابتي ځواکونه یې د عراق، لبنان، سوریې (شام) او یمن په کړکېچونو کې ترهګرۍ او ناکرارۍ ته لمن وهي چې ناوړه بشري عواقب لري.

هغه وویل، که ملګري ملتونه پرېږدي چې پر ایران د وسلو د پلورلو بندیز د ۲۰۲۰ز کال په اکتوبر کې پای ته ورسي، تهران به ګډوډي پیدا کړي.

پر ایران د ملګرو ملتونو له خوا د لګول شویو بندیزونو په ترځ کې د ایران د انقلاب ساتونکي ځواک او د قدس ځواک پر قوماندان قاسم سلیماني د سفر بندیز هم لګول شوی دی.

پر نورو ۲۳ ایراني چارواکو هم د سفر بندیزونه لګول شوي دي.

د ایران لپاره د امریکا ځانګړي استازي براین هوک د مایک پامپیو تر دې څرګندونو مخکې د اګست پر ۲۰مه، په نیویارک کې خبریالانو ته وویل د ملګرو ملتونو له خوا لګول شوي بندیزونه ځکه ډېر مهم دي چې پر ایران د وسلو د پلورلو او هم یې پر چارواکو د سفر بندیزونه دوام ومومي.

سپېن کې افغان سفير لوټل شوی

هسپانوي پوليس (ارشيف)

د اروپايي هېواد سپېن پوليس او سفارتي سرچينې وايي چې په دغه هېواد کې د افغانستان سفير لوټل شوی دی. دا پېښه په دا وروستيو کې د سپېن په شمال ختيځ مديتراني ساحل کې له شوو لويو پېښو څخه يوه ګڼل کېږي.

د پوليس يو وياند وايي چې بريدګرو د اګست پر ۱۸مه د بارسلونا ښار په مرکز کې په يوه کوڅه کې د همايون رسا د قيمتي ساعت اخيستلو لپاره هغه پر مځکې ټېل واهه. په مېډريډ کې د افغان سفارت يوې سرچينې ويلي چې رسا په پښه کې معمولي زخمي شوی خو جوړ دی. نوموړی بارسلونا ته د افغانستان د خپلواکۍ د جشن لمانځلو لپاره تللی و.

هسپانوي ورځپاڼې ايل پېريوډيکو راپور ورکړی چې د همايون رسا د لاسي ساعت بيعه ۱۷ زره يورو وه. په بارسلونا کې د رسا د لوټلو پېښه په داسې حال کې رامنځ ته شوې چې د اروپا په دغه يو تر ټولو سېلګريز ښار کې په دا وروستيو کې جرايم زيات شوي چې پر مهال يې يو شمېر بهرنيان لوټل شوي دي.

په خېبر بښتونخوا کې د سیلابونو خبرداری ورکړل شوی

په ۲۰۱۱م سیلابونو کې د کالام اغیزمن شوی سړک

په خیبر پښتونخوا کې د افتونو سره د مبارزې د ادارې مشر پرويزخان د اګست پر ۱۹مه مشال راډیو ته وویل، خلکو ته یې د سیلابونو خبرداری ورکړی او ورته یې ویلي چې ويښ بیدار دې اوسي.

نوموړی وايي د دوه قسمه سیلابونو وېره دوی ویني، لومړی د بارانونو له وجې او دوهمه دا چې د معلوماتو پر اساس کېدی شي د هند د «السي» ډیم اوبه پر پاکستان پرېښودل شي. دا اوبه د ګلګت بلتستان له لارې د خیبر پښتونخوا ځینو سیمو ته تلی او هغه ځایونه اغېزمنولی شي.

نوموړی وايي د اباسین پر غاړه ابادو کلیو خلکو ته یې خبرداری ورکړی چې له احتیاطه کار واخلي. هغه زیاتوي چې د سیلابونو له وجې د بره کوهستان، پټن، بټګرام، تورغر، مانسهره ، ایبټ اباد، هریپور، نوښار او ډېره اسماعیل خان اغېزمنېدای شي.

اپوزیشن په اسلام اباد کې حکومت مخالفه مظاهرې پیلوي

د ۲۰۱۹ په جولایي کې د اپوزیشن ګوندونو مشران

په اسلام اباد کې د اپوزېشن ګوندونو په ټولګوندیزه غونډه کې پرېکړه وکړه چې د اوسني حکومت پر ضد به په اسلام اباد کې د مظاهرو لړۍ پېلوي.

غونډه د جمیعت علما اسلام (ف ) د مشر مولانا فضل رحمان لخوا د اګست پر ۱۹مه غوښتل شوی وو چې پکې د اپوزیشن د ټولو ګوندونو مشرانو او استازو ګډون وکړ.

مولانا فضل رحمان د غونډې په پای کې وویل چې د اګست پر ۲۹مه به د حکومت پر ضد د مظاهرو د پیلولو لپاره نېټه ټاکل کېږي.

بل پلو د پاکستان د وزیراعظم د اطلاعاتو سلاکارې فردوس عاشق اعوان په یو ټویټر بیان کې لیکلي د اپوزیشن ټولګوندیزه کانفرانس د خپلمنځي سیاست یوه هڅه وه او د دوی حکومت ته ترې هېڅ قسمه خطره نشته.

په بلوچستان کې د ځوانو ډاکټرانو کاربندیز دوام لري

په ۲۰۱۸ کې په کوټه کې د ځوانو ډاکټرانو د احتجاج عکس

د بلوچستان په مرکز کوټه او نورو سیمو کې د ځوانو ډاکټرانو کاربندېز روان دی. دوی له تېرو دوو ورځو راهېسې او پي ډیز هم بندې کړي دي چې له وجې یې خلک د سختو ستونزو سره مخ دي.

د ډاکټرانو د اتحادیې ویاند ډاکټر رحیم خان د اګست پر ۲۰مه مشال راډیو ته وویل، حکومت د دوی د تحفظ له پاره هېڅ ‌ډول ګامونه نه پورته کوي چې له وجې یې دوی پر هړتال کولو مجبوره شوي دي.

نوموړي دړکه وکړه چې که حکومت د دوی غوښتنې و نه منلې نو دوی به په ایمرجنسي وارډونو کې هم کار بند کړي.

د کوټې په ګډون د بلوچستان په یو شمېر هسپتالونو کې ځوانو ډاکټرانو کاربندیز د اګست له لسمې پیل کړی دی.

خو بل پلو د بلوچستان د حکومت ویاند لیاقت شاهواني مشال ته وویل چې د ډاکټرانو هړتال غیر قانوني دی او حکومت ورسره هر وخت خبرو ته چمتو دی.

د پاکستان وزیراعظم د پوځ د مشر دنده تر درو کلونو وغځوله

وزیراعظم عمران خان د جنرال باجوه د دندې موده غځولې

د پاکستان وزیراعظم عمران خان د پوځ د مشر جنرال قمر جاوېد باجوه د دندې موده تر درو نورو کلونو غځولې ده.

د هېواد دولتي راډیو د اګست پر ۱۹مه ویلي چې وزیراعظم دا اقدام د ((سیمې امنیتي ماحول)) ته په کتو کړی دی.

ټاکل شوې وه چې د جنرال باجوه دنده د ۲۰۱۹ز کال په نومبر کې پای ته ورسي.

د وزیراعظم له دفتره په خپور فرمان کې راغلي چې د باجوه د دندې دویم پړاو به یې د لومړي هغه تر پای وروسته پیلېږي.

باجوه د ۲۰۱۶ز کال په نومبر کې د پوځ پخواني مشر جنرال راحیل شریف د دندې تر پای وروسته د هغه وخت وزیراعظم نواز شریف د پوځ مشر کړی وو.

امریکا کې د افغانستان سفارت د پاکستان سفیر څرګندونې رد کړې

د افغانستان او پاکستان بیرغونه

په واشنګټن کې د افغانستان سفارت د کشمیر له شخړې سره د افغانستان د مسلې د تړلو په اړه د پاکستان د سفیر پر څرګندونو غبرګون ښودلی دی.

په واشنګټن کې د افغانستان سفارت د اګست پر ۱۸مه په یوه خبرپاڼه کې وویل، د پاکستان د سفیر اسد مجید خان دا څرګندونې بې اساسه دي چې ګنې په کشمیر کې روان کړکېچ د افغانستان د سولې بهیر اغېزمنوي.

د افغانستان سفارت ویلي چې د افغانستان له سولې سره د کشمیر د حالاتو تړل بې دلیله، غیر مسوولانه او غیر موجه دي.

تر دې مخکې هم ځینو پاکستاني چارواکو ویلي ول چې ممکن د کشمیر وضعیت د افغانستان د سولې روان بهیر چې پاکستان پکې مهم رول لري، اغېزمنه کړي.

خو په کابل کې د پاکستان سفیر د هند تر واک لاندې کشمیر کې د اګست پېنځمې تر بدلونونو وروسته په خبري غونډه کې سپینه کړې وه چې د کشمیر لانجه له افغانستان سره هېڅ تړاو نه لري.

بره دیر کې په بمي چاودنه کې څلور کسان وژل شوي

په بر دیر کې د سړک تر غاړې بمي چاودنه کې لږ تر لږه څلور کسان وژل شوي او ۲۲ نور ژوبل دي.

د دیر ضلعې پولیسو مشر میا نصیب جان د اګست په ۱۸ مه مشال راډیو ته وویل چې دا پېښه هم د دغه ورځې مازیګر مهال د شیرینګل سیمې په حیاګي کې شوې چې پکې د یو ځايي مشر ملک معتبر خان قافله په نښه کړل شوې ده.

ملک معتبر خان د طالبانو پر ضد د امن لښکر مشري هم کړې ده. تحریک طالبان پاکستان د دې برید ذمه واري منلې ده. خو پولیس وايي ملک معتبر خان او ملګري یې شخصي دشمنۍ هم لري نو ځکه به دوی د دې پېښې هر اړخیز تحقیقات کوي.

سوډان: د پوځ او اپوزیشن ترمنځ د واک پر وېش تړون وشو

په سوډان کې د پوځ او اپوزیشن ترمنځ د واک پر وېش تړون وشو

د سوډان پوځ او په هغه هېواد کې د سیاسي اپوزېشن ایتلاف ترمنځ د واک د شریکولو موافقه لاسلیک شوه.

دا ګام د اګست پر ۱۷مه په پلازمېنه خرطوم کې پورته کړل شو.

دا موافقه به په یاد هېواد کې ملکې واکمنۍ ته لاره هواره کړي. په اپریل مياشت کې له لاریونونو وروسته ولسمشر عمر البشیر له واکه لرې کړل شوی وو.

د دې تړون پر اساس به یوه خپلواکه شورا چې پر شپږو ملکي وګړو او پنځو پوځي قومندانانو مشتمله وي، په هېواد کې تر انتخاباتو چاري سنبالوي.

ټاکل شوې چې د هېواد وزيراعظم په راتلونکې اوونۍ کې وټاکل شي.

ایران څلور بندیوانې مېرمنې خوشې کړې

د بشري حقونو د څار د نړېوالې ادارې يوې څېړونکې ويلي، تهران هغه څلور مېرمنې خوشي کړې چې په مبينه توګه د سړو په جامو کې د فټبال لوبې کتو ته لوبغالي ته ورغلې وي.

دوي د ايراني حکومت لخوا د لوبو میدان ته د ښځو پر ورتګ د بنديز ضد د احتجاج لپاره دا ګام پورته کړی وو.

د سازمان یوې څېړونکې تارا سفريفر د اګست پر ۱۷مه په ټوېټر وويل چې یادې څلور مېرمنې په ضمانت خوشي شوې دي.

د بشري حقونو د څار ادارې یوې مشرې منکي ورډن د اګست پر ۱۶مه د فټبال پر نړېوال فیدراسیون یا فیفا غږ کړی وو چې د ایران پر ضد دې بندیزونه اعلان کړي ځکه چې هغوی جنسي توپېر پالي.

د اګست پر ۱۷مه په خوشې شویو مېرمنو کې د زهرا خوشنواز په نوم یوه مشهوره مدني فعاله هم شامله ده. تر څنګ یې نورې خوشې شوې ایرانۍ مېرمنې فروغ الايي، لیلي مالیکی او هدیه مروستي نومېږي.

یوکراین: پر هوټل د اورلګېدو پېښې ۱۷ کسانو ته مرګ ژوبله اړولې

په  ټوکیو سټار نومې هوټل کې 273 کمرې دي او اور وژونکیو په دریو ګېنټو کې په اور قابو ومونده.

د یوکراین د بیړنۍ ادارې ترمخه د دغه هېواد په جنوبي بندر اوډېسه کې د اګست د ۱۷مې په سهار په یو شخصي هوټل کې د اور لګیدو په پېښه کې اته کسان وژل شوي او لس نور ژوبل شوی دي.

د یوکراین د بیړنۍ ادارې په یو بیان کې ویلي چې ۱۰ کسان د پېښې له ځایه ژغورل شوي دي.

په بیان کې دا نه دي ویل شوي چې د اورګېدو پر مهال په هوټل کې څومره کسان موجود وو. دوی دا هم نه دي ویلي چې د اور لګېدو علت څه وو؟

په ټوکیو سټار نومې هوټل کې 273 کمرې دي او اور وژونکیو په دریو ګېنټو کې په اور قابو ومونده. د پولیسو په وینا د پېښې پلټنې پېل شوي دي.

عمران خان د کشمیر په اړه د سلامتي کونسل د غونډې هرکلی وکړ

د پاکستان وزیراعظم عمران خان

د پاکستان وزیراعظم عمران خان د جمو او کشمیر د لانجې د هوارۍ لپاره د ملګرو ملتونو د سلامتي کونسل د غونډې هرکلی کړی دی.

نوموړي د اګست پر ۱۷مه، په خپله ټویټر پاڼه لیکلي، د جمو او کشمیر په اړه د ملګرو ملتونو د سیکیورټي کونسل د غونډې هرکلی کوي چې پکې په دغه سیمه کې په موجوده حالاتو بحث وشو.

عمران خان لیکلي، دا په تېرو پنځوسو کلونو کې لومړی ځل دی چې د کشمیر مسله په داسې نړیوال فورم کې پورته کړل شوه.

دا له هغې وروسته ده چې د اګست پر ۱۶مه، د ملګرو ملتونو امنیتي کونسل په پاکستان او هند غږ وکړ چې د کشمير په مسله دې له زغمه کار واخلي.

د پاکستان په غوښتنه بلل شوې د امنيتي شورا غونډه د اګست پر ۱۶مه، په نيو يارک کې وشوه.

دا په داسې حال کې ده چې د اګست په پنځمه د هند حکومت د يو صدارتي فرمان له مخې د هند تر واک لاندې د جمو او کشمير ځانګړی اييني حیثيت ختم کړ، او دغه سیمه یې له خپل هېواد سره یو ځای کړه.

زرداري په عدالتي ریمانډ اډیالې جیل ته لېږل شوی

د پاکستان پخوانی ولسمشر اصف علي زرداري

په اسلام اباد کې د احتساب یو عدالت د پیپلز ګوند مشر او پخوانی ولسمشر اصف علي زرداري په عدالتي ریمانډ د اګست تر ۱۹مې نیټې اډیالې جیل ته لیږلی دی.

نوموړی د اګست پر ۱۶مه د احتساب عدالت ته وړاندی کړل شو، چیرته چې حکومتي وکیل له عدالته د زرداري د جسماني ریمانډ غځولو خواست وکړ.

د عدالت له خوا په یوه اعلامیه کې ویل شوي چې د جعلي بانک اکاونټونو په مقدمه کې د اصف علي زرداري عدالتي ریمانډ د اګست تر ۱۹مې نیټې غځول شوي دی.

د اصف علي زرداري لور بختاور بوټو زرداري د اګست پر ۱۶مه په خپله ټویټر پاڼه لیکلي سره د دې چې پلار يې د احتساب قامي ادارې ۶۸ ورځې په خپل تحویل کې وساته او د یو کال ډېره موده ترې پوښتنې وشوې، بیا هم نن د اډیالې زندان ته ولیږل شو.

د اصف علي زرداري خور او د سیند اسمبلۍ غړې فریال تالپور هم د احتساب د ادارې لخوا نیول شوی او د اډیالې په زندان کې ساتل شوې ده.

د کرملېن ماڼۍ په انګړ کې ناچاودی بم موندل شوی

د کرملېن ماڼۍ

د کرېملېن ماڼۍ په انګړ کې د دویمې نړیوالې جګړې له مهاله پاتې یو ناچاودی بم موندل شوی دی.

د روسيې رسنیو له رپورټونو سره سم، دا بم د مسکو سیند ته نېږدې د کرېملېن په تاینیڅکي بڼ کې د تعمیراتي کار پر مهال موندل شوی دی.

چارواکي وايي، بم یې د کرېملېن له ودانۍ ایستلی چې شنډ یې کړي.

د روسیې د ولسمشر ویاند رسنیو ته ډاډ ورکړی چې د دې بم موندل کېدو د ولسمشر د کار مهالوېش نه دی زیانمن کړی.

کرېملېن په اروپا کې د منځنیو پېړیو له ډېرو لرغونو ماڼیو څخه ده چې د ۱۴ او ۱۵ پېړۍ ترمنځ کلونو کې جوړه شوې.

د ایراني ټانکر کارمندان ښايي د ویزې بندیز ولري: امریکا

د ارشیف انځور

امریکا ویلي دي چې په جبل الطارق کې د ایران ټانکر د عملې غړي ښايي د ویزې له بندیز سره مخامخ شي.

دا خبره د امریکا د بهرنیو چارو وزارت ویاندې مورګن اورټاګس بېګا ناوخته تر هغې وروسته وکړه چې د برتانیې تر واک لاندې سیمې جبل الطارق د اګست پر ۱۵مه د ګرېس ۱ په نوم د ایران د تېلو ټانکر خوشې کولو فیصله وکړه او واشنګټن یې د تګ په مخنیوي کې پاتې راغی.

اورټاګس ویلي چې دې بېړۍ د ایران د انقلاب ساتونکي ځواک مرسته کوله چې واشنګټن یې ترهګر سازمان بولي.

د نوموړې په خبره، د بېړۍ خوشې کول ورسره د تړلیو کسانو لپاره جدي پایلې لرلای شي.

هغې زیاته کړه چې د بېړۍ د عملې کسان ښايي امریکا ته د داخلېدو یا د هغه هېواد د ویزې ترلاسه کولو قانوني جواز و نه لري.

دا بېړۍ شاوخوا شپږ اوونۍ مخکې برتانیوي بحري ځواک شام ته د تېلو قاچاق، چې د اروپايي ټولنې د بندیزونو سرغړونه بلل کېږي، په تور ونیوله.

د جبل الطارق اعلا وزیر فبیان پېکاردو د اګست پر ۱۵مه د تهران تر لیکلي ضمانت وروسته د ټانکر د نیولو امر ختم کړ.

ایران نوموړي ته باور ورکړی چې ټانکر به شام ته له دوه میلیونه بیرلو څخه زیات تېل نه ورکوي.

م.م: د ۲۰۱۹ز په اووه میاشتو کې دوه لاکه افغانان بې کوره شوي

په تېرو کلونو کې لسګونه زره افغانان ناامنیو ځپلي، بې کوره کړي

د ملګرو ملتونو د بشري چارو د همغږۍ دفتر (اوچا) ویلي، د روان کال په تېرو اووه میاشتو کې په افغانستان کې دوه لاکه ۱۷ زره خلک د جګړو له وجې خپلو کورونو پرېښودو ته اړ شوي دي.

اوچا د اګست پر ۱۵مه، په یوه بیان کې وویل، د دومره زیاتو خلکو د بې کوره کېدو له وجې د بشري مرستو لویه اړتیا پېښه شوې.

بیان وايي، په بې کوره شویو کې ۵۸ فیصده کسان له ۱۸ کلونو کم عمر لرونکي دي.

د ملګرو ملتونو د بشري چارو د همغږۍ دفتر وايي، په افغانستان کې شاوخوا یو میلیون بې کوره خلک به د روان کال تر پایه مرستو ته ضرورت ولري.

بیان زیاتوي، د روان کال په اووه میاشتو کې په ایران کې د اقتصادي بحران له وجې شاوخوا ۲۷۰،۰۰۰ او له پاکستانه شاوخوا ۱۷،۰۰۰ افغانان وطن ته ستانه شوي.

کشمیر به اوس پرمختګ وکړي: مودي

د هند وزیر اعظم نریندرا مودي.

د هند وزیر اعظم ویلي، د کشمیر ځانګړي حثیت ختمولو سره به د سیمې تاریخي عظمت بیا بحال شي او له دې سره به هېواد پرمختګ وکړي.

د هند د ازادۍ ورځې په مناسبت په وینا کې نریندرا مودي وویل، د کشمیر په ځانګړي حثیت کې اداري فساد، خپلوي-پالنه او بې انصافي زیاته وه.

د هند تر واک لاندې کشمیر کې د اګست له ۱۴مې کرفیو لګول شوی او مواصلاتي نظام پرې کړل شوی دی.

له دې یوه ورځ وروسته حکومت کشمیر ته ورکړل شوی ځانګړی حثیت ختم کړ.

پاکستان د دې پریکړې په غبرګون کې له هند سره تجارتي اړیکې او د دواړو هېوادونو ترمنځ د ټرانسپورټ نظام ځنډولی.

همدا راز اسلام اباد هندی سفیر له هېواده ویستلی دی.

په ننګرهار کې د داعش دوه مهم غړي نیول شوي

ارشیف، دوه تنه نیول شوي جنګیالي

د افغانستان امنیتي چارواکي وايي، د ننګرهار په بټي کوټ ولسوالۍ کې یې د داعش دوه تنه مهم غړي نیولي دي.

د کورنیو چارو وزارت د اګست پر ۱۳مه ناوخته یو بیان کې ویلي، په نیول شویو کسانو کې یو کس عبدالرحمن نومېږي چې په "طلحه" مشهور دی.

د کورنیو چارو وزارت د خبرپاڼې په وینا نوموړي د داعش د وسله‌ والو لپاره د ځانمرګو واسکټونو د جوړولو مسؤلیت درلود او د بټي کوټ اوسېدونکی دی.

د بل نیول شوي کس د هویت په اړه څه نه‌ دي ویل شوي، خو زیاته شوې چې د داعش ډلې له دې دوو مشکوکو غړو سره وسلې او مهمات هم نیول شوي دي.

له تېرو څو کلونو راهیسې د داعش وسله‌ والې ډلې په افغانستان کې د ګڼ شمېر خونړیو بریدونو او چاودنو مسولیت منلی.

د امنیتي ادارو په وینا د داعش د خراسان څانګه د افغانستان په څو ولایتونو کې فعالیت لري، خو د بټي کوټ په شمول د ننګرهار په یو شمېر ولسوالیو کې یې موجودیت او فعالیتونه تر نورو سیمو پراخ او زیات دي.

د پاکستانيو حاجیانو خپل ټاټوبي ته د ستنولو لړۍ ژر پیلېږي

په سعودي عرب کې د حج مراسم.

د پاکستان سرکاري میډیا وایي، په سعودي عرب کې د حج مراسم پای ته تر رسېدو وروسته به روانه اونۍ پېښور او اسلام اباد ته د حاجیانو خپل وطن ته ستنېدل پیل شي.

سږ کال له پاکستانه دوو لکو کسانو د حج په مراسمو کې برخه واخیسته.

بلخوا د افغانستان د حج او اوقافو وزارت وايي، د راروانې جمعې ورځې به له سعودي عربه بیرته خپل وطن ته د افغان حاجیانو د ستنېدو بهیر پیلېږي.

د دې وزارت ویاند ناصر الدین د اګست پر ۱۳مه مشال راډیو ته وویل، افغان حاجیان به د اګست پر ۱۴مه د طواف الوداع وروستي مراسم پر ځای کړي او ټاکل شوې د اختر له شپږمې ورځې څخه یې خپل هېواد ته ستنیدل پیل شي.

سږ کال له افغانستانه د حج په مراسمو کې شاو خوا ۳۰۰۰۰ زره افغانانو برخه اخیستې.

دا اختر دې د افغان جګړې وروستی اختر وي: خلیلزاد

د افغانستان د سولې لپاره د امریکا خاص استازی زلمی خلیلزاد.

د افغانستان سولې لپاره د امریکا ځانګړی استازی زلمی خلیلزاد واشنګټن ته ستون شوی دی.

خلیلزاد په خپله دا خبره د اګست پر ۱۲مه د شپې مهال په ټویټر لیکلې او ویلي یې دي چې د اتم پړاو خبرې بشپړې شوې.

د امریکا او طالبانو خبرې د اګسټ له درېیمې د قطر په پلازمېنه دوحه کې پيل شوې وې او د اګسټ پر ۱۲مه پای ته ورسېدې.

د افغان سولې لپاره د امریکا خاص استازي زلمي خلیلزاد زیاته کړې چې دا خبرې ګټورې وې او دواړو مرکچي پلاویو څو ورځې په تخنیکي جزیاتو تمرکز درلود.

خلیلزاد مخکې د اختر په لومړۍ ورځ ویلي و چې د سولې د یوې تلپاتې او عزتمنې پخلاینې او د یوه خپلواک افغانستان لپاره چې نورو هېوادونو ته ګواښ نه‌ وي نه‌ ستړی کېدونکی کار کوي.

هغه هیله ښودلې وه چې دا اختر دې د افغانستان د جګړې وروستی اختر وي.

طالبانو هم اتم پړاو خبرې ګټورې بللي او ویلي یې دي چې د راتلونکو ګامونو په اړه هر لوری له خپل مشرتابه سره مشورې کوي.

د افغانستان د ولسمشر ویاند صدیق صدیقي تر دې خبرو وروسته مشال راډیو ته وویل ټولې هغه خبرې چې نتیجه‌ یې د جګړې ختم او اوربند وي دوی ته مهمې دي.

کورنیو چارو وزارت د بندیانو د خوشې کولو په اړه د طالبانو ادعا رد کړه

ارشیف، په غزني کې یو شمېر طالب جنګیالي

د افغانستان د کورنیو چارو وزارت د طالبانو هغه ادعا ردوي چې وايي، د افغان ځواکونو ۷۶ اسیر سرتېري یې د اختر په مناسبت خوشې کړي دي.

د کورنیو چارو وزارت په یوه خبرپاڼه کې چې پرون خپره شوه، د طالبانو د هغه بیان یادونه کړې چې د شنبې په ورځ‌یې خپور کړ او په هغه کې یې ویلي، دا سرتېري په کندز، ارزګان، خوست او سرپل ولایتونو کې خوشې شوي دي.

د کورنیو چارو وزارت وايي طالبانو دا بیان د تبلیغاتو په هدف خپور کړی. د دې وزارت خبرپاڼه زیاتوي چې د هېواد له بېلابېلو ولایتونو څخه د دوی د معلوماتو له مخې په تېرو څو ورځو کې د طالبانو له بنده د افغان ځواکونو هېڅ یو سرتېری هم نه‌دی خوشې شوی.

د کورنیو چارو وزارت پر طالبانو غږ کړی چې که یې په دې برخه کې په رښتیا کومه پرېکړه کړې وي او یا غواړي اسیر شوي افغان پوځیان خوشې کړي، نو باید لېست او نومونه‌یې خلکو ته وښيي.

دفاع وزارت: په لوګر کې د طالبانو یو مهم قوماندان ووژل شو

ارشیف. په لوګر کې د افغان ځواکونو عملیات

د افغانستان دفاع وزارت په لوګر ولایت کې د طالبانو د یوه مهم قوماندان د وژل کېدو خبر ورکوي.

د دفاع وزارت ویاند روح‌الله احمدزي تېره شپه ازادي راډیو ته وویل چې د ملا نقیب‌الله په نوم دا قوماندان په پادخواب شانه سیمه کې د افغان ځواکونو په تصفیوي عملیاتو کې وژل شوی.

ښاغلی احمدزی وايي ملا نقیب‌الله د هېواد په کچه په ترورېستي فعالیتونو کې ښکېل و.

ښاغلی احمدزی زیاتوي: "دا هغه شخص و چې نه‌یوازې په لوګر، بلکې په نورو ولایتونو کې یې د حملو په ترسره کولو کې مهم رول درلود او هغه نن زموږ د ځواکونو د عملیاتو په پایله کې ووژل شو."

دفاع وزارت همداراز وايي، افغان ځواکونو د میدان وردګ ولایت په نرخ ولسوالۍ کې د طالبانو یو مهم قوماندان، قاري داوود او د هغه پنځه وسله‌وال وژلي دي.

دفاع وزارت په یوه خبرپاڼه کې چې پرون خپره شوه وايي د طالبانو دا قوماندان پرون مازیګر د نرخ ولسوالۍ په توکرک سیمه کې د هوايي عملیاتو په ترڅ کې وژل شوی دی.

بندیزونو د ایران او جرمني سوداګري کمه کړې

عکس له ارشیفه

راپورونه وايي، د ایران او جرمني ترمنځ د تجارت د کچې ټيټیدل ښکاره کوي چې د ایران پرضد د امریکا بندیزونه د هغو هېوادونو په تجارتي ترجیجاتو اغیز کوي چې غواړي، له تهران سره سوداګري وکړي.

رویټرز اژانس لیکي، د روان کال په لومړیو شپږو میاشتږ کې ایران ته د جرمني برامدات د ۴۸ فیصده ټیټوالي پس ۷۵۹ میلیونو ډالرو ته ټیټ شوي دي.

همدا رنګه د ایران لخوا جرمني ته د مالونو د پلورلو کچه هم ۴۳ فیصده ټیټیدو سره ۱۲۳ میلیونه ډالرو ته کم شوي.

د امریکا تازه بندیزونه له لارې د دریمګړو هېوادونو هغو شرکتونو ته سزا ورکړل کېږي چې له ایران سره تجارتي اړیکې ساتي.

د امریکا ولسمشر ډونلډ ټرمپ تېرکال د ایران او د نړی د طاقتورو هېوادونو ترمنځ په ۲۰۱۵ز کال کې د شوې اټومي تړون څخه ووته.

په دې تړون کې ژمنه شوې وه چې که د تهران اټومي پروګرام پرامنه پاتې شو نو له هغه هېواده به اقتصادي بندیزونه لیري کېږي.

نور پورته کړئ

ځانګړې پاڼې

له موږ سره اړیکي

XS
SM
MD
LG