د پښتو ژبې نومیالی شاعر عمر دراز مروت مړ شوی
د نوموړي ورور او ملګرو بېګا مشال راډیو ته وویل چې مروت له ۱۰ورځو راهیسې د پېښور په خیبر یا شېرپاو هسپتال کې بستر وو چې تېر ماښام مړ شو. دوی وايي، د نوموړي جنازه نن د نومبر پر ۳۰مه په لکي مروت کې کېږي. د پښتو ژبې شاعر ګوهر وزیر وايي، مروت واده نه وو کړی، په ډېره بېوزلۍ یې ژوند تېر کړ خو ټول عمر یې د پښتو ژبې د ودې لپاره کار وکړ. دی زیاتوي چې مروت له ۱۰۰ زیاتو کتابونو او شعري ټولګو لیکوال او مولف وو.