بریتانیا له هغو سلګونو زرو افغانانو سره چې د وچکالۍ له خطر سره مخامخ دي، د ۲۵ میلیونه پونډه مرستې ژمنه کړې.
په کابل کې د بریتانیا سفارت د نومبر په ۲۶ مه د یوې اعلامیې په خپرولو سره دا اعلان وکړ.
اعلامیې د بریتانیا د نړیوالې پرمختیایي ادارې د مشر پیني مورډنټ له خولې لیکلي چې په دې مرستو کې به هغو افغانانو ته چې وچکالۍ سخت ځپلي، خوراکي مواد، سرپناه او د څښلو پاکې اوبه برابرې شي.
دا نوې مرسته د بریتانیا نړیوالې پراختیایي ادارې له خوا له کړکېچونو سره د مرستې له صندوقه ورکول کېږي.
افغانستان په دا وروستیو لسیزو کې سختو وچکالیو ځپلی دی چې تر ډېره یې د خلکو کرنې او مالدارۍ ته زیان اړولی دی.
پیني مورډنټ د جنیوا تر کنفرانس وړاندې ویلي چې په افغانستان کې مرګوني وچکالۍ له وړاندې میلیونونه کسان ځپلي دي چې ډېری یې له همدې کبله د خپلو سیمو پرېښودو ته اړ شوي دي.
نوموړي ویلي، د بریتانیا تر څنګ نور مرستندویه هېوادونه هم باید په دې برخه کې اقدامات وکړي.
ټاکل شوې د نورو مسایلو ترڅنګ د افغانستان د وچکالۍ پر بحران هم د جنیوا د کنفرانس په ترڅ کې خبري وشي چې د نومبر پر ۲۷ مه او ۲۸ مه رابلل شوی دی.
په سویس کې د افغانستان سفیرې ثریا دلیل له ازادي راډیو سره په مرکه کې وویل:
"د نومبر پر ۲۷مه د جنیوا غونډې په پیل کې پر څلورو موضوعاتو خبرې کېږي چې په هغه کې د ښځو پیاوړتیا، خصوصي سکټور، بېځایه شوي، د خوړو امنیت او وچکالي ده چې پر هرې موضوع به یو نیم ساعت خبرې وشي."
بریتانیا له افغانستان سره د بشري مرستو په برخه کې دوهم لوی هېواد دی.
د افغانستان له طبیعي پېښو سره د مبارزې اداره پخلی کوي چې د دې هېواد شل ولایتونه د وچکالۍ له کبله د غذايي موادو د کمښت سره لاس او ګرېوان دي.
د ملګرو ملتونو د سازمان په حواله، سږکال په افغانستان کې تردوه میلیونه زیات وګړي د شدیدې وچکالۍ له امله خوړو او د څښلو پاکو اوبو ته اړ دي.
ملګرو ملتونو په افغانستان کې سږنۍ وچکالي بې سارې بللې ده او اړو کسانو ته یې د بیړنیو مرستو رسولو غوښتنه کړې.
د دې سازمان په وینا، سږ به د نورو کلونو په پرتله په افغانستان کې ورښتونه ۷۰ فیصده کم وي او دا به پنځم کال وي چې پرله پیسې د کروندګرو بر کمېږي.
د دې سازمان په حواله، د افغانستان په درو کې دوې برخې په تېره په شمال او لوېدیځ کې وچکالۍ ځپلې دې.
