د لاسرسي ځای

تازه خبر

د پاکستان حکومت غواړي قبایلي جرګې "قانوني" کړي


د قبایلي سیمو یو شمېر سازمانونو د اصلاحاتي بهیر ګړندي کولو لپاره مظاهرې کړې دي.

پراګ - په خیبر پښتونخوا د قبایلي سیمو د ورګډولو کاري ډلې غړی او د مذهبي چارو وفاقي وزیر پیر نورالحق قادري وايي، حکومت غواړي چې جرګه قانوني کړي چې خلکو ته په چټکۍ انصاف ورسي.

نوموړي د اکتوبر پر ۱۷مه مشال راډيو ته وویل، د پاکستان تحریک انصاف په مشرۍ وفاقي حکومت غواړي چې جرګه بیا فعاله کړي ځکه چې دا د خلکو غوښتنه ده.

د پاکستان تېر پارلېمان او پخواني ولسمشر ممنون حسین د مې په پای کې، په خیبر پښتونخوا د قبایلي سیمو د ورګډولو اییني مسوده منظوره کړه چې تر هغې وروسته په قبایلو کې اصلاحاتي بهیر پیل شو.

په سېپټېمبر کې د پاکستان نوي وزیراعظم عمران خان، د دې بهیر د ګړندي کولو لپاره یوه کاري ډله جوړه کړه.

د قبایلي سیمو په اصلاحاتي نکاتو کې یوه هلته د رواج په نوم د قانون وه چې له لارې به یې جرګګۍ د ولسي لانجو او شخړو د هواري لپاره پلټنې کوي. له قادري مو پوښتنه وکړه چې دوی چې اوس د قبایلو دودیزه جرګه قانوني کوي نو له هغه رواج ایکټ سره به څه کېږي؟

دی وايي، په دواړو کې توپیر نشته خو دوی غواړي چې جرګه شفافه او د پارلېمان له لارې یې قانوني کړي.

د قادري په خبره، قانوني مسوده باید له قامي اسمبلۍ، سېنېټ او د خیبر پښتونخوا له اسمبلۍ څخه منظوره شي.

خو د قبایلي چارو پوه او پخوانی سفیر ایاز وزیر، چې په خیبر پښتونخوا یې د قبایلو د ورګډولو پر ضد هلې ځلې کولې، وايي، هر هغه عمل چې پکې د قبایلي سیمو خلک نه وي شامل، تلپاتې او موثره نشي زباتېدای.

د وزیر په خبره، د اصلاحاتي بهیر له پیل راهیسې، د سیمې له ولسه پوښتنه نه ده شوې.

دی وايي، د قبایلو خلکو ته طریقې او چلونه ورځي چې اصلاحاتي اقدامات څنګه واخلي، خو ورڅخه څوک پوښتنه نه کوي.

'په مومندو کې به تاڼې د ولس په خوښه جوړېږي'
تم شئ

هېڅ میډیايي سرچینه اوس نشته

0:00 0:01:58 0:00

د قبایلي سیمو د اصلاحاتي بهیر د کاري ډلې غړی پیر نورالحق قادري وايي، حکومت به ژر د جرګو د قانوني کولو مسوده تیاره او پارلېمان ته وړاندې کړي، خو د دې کار نېټه یې و نه ښوده.

دی البته وايي،چې حکومت د قبایلي ولسوالیو د هر تحصیل پر کچ یوه داسې جرګه جوړوي چې پکې به قامي مشران شامل وي او د انتظامیې له واکه به ازاده وي.

دی زیاتوي چې دا جرګې به د شخړو د هواري هغو شوراګانو ته ورته وي چې د تحریک انصاف تېر حکومت د خیبر پښتونخوا په تاڼو کې جوړې کړې وې او دا چې خلک به دا واک لري چې خپلې مسلې جرګو ته یوسي او که نه مستقیماً عدالت ته ورشي.

XS
SM
MD
LG