د لاسرسي ځای

تازه خبر

د امريکا د کانګرس انتخاباتو ته د پام وړ شمېر ښځې ولاړې دي


د امریکا کانګرس.

د امريکا د استازو مجلس ۴۳۵ او همداراز د سينټ ۳۵ څوکيو ته چې ټاکل شوې انتخابات يې د راتلونکې نومبر مياشتې پر شپږمه وشي، يو زيات شمېر ښځې د نوماندانو په توګه ميدان ته راوتلې دي.

د ۳۳ ايالتونو د ګورنرانو څوکيو او د ايالتونو د اسمبليو انتخاباتو ته هم ښځې ولاړې دي.

د نيو جرسي ايالت په روټګرز پوهنتون کې د (امريکايي ښځې او سياست) مرکز څېړنې ښيي چې د استازو په جرګه کې د څوکۍ تر لاسه کولو لپاره ۲۳۹ او د سېنېټ د هغې لپاره ۲۳ ښځينه کانديدانې مخ ته راغلې دي.

که څه هم راتلونکو انتخاباتو ته د ښځينه غړيو د نوماندۍ رجحان د امريکا په دواړو سياسي ګوندونو کې زيات دی، د ډيموکريټېک ګوند د ښځينه کانديدانو شمېر د رېپبلېکن د هغو په مقابل کې سېوا دی.

د روټګرز پوهنتون د ياد مرکز يوې مشرې جين سېنزداک ويلي، په ريښتيا چې سږ کال د تېر بل هر کال پرتله يو زيات شمېر ښځې په انتخاباتو کې برخه اخلي.

د نوموړې د معلوماتو تر مخه، د امريکا په ۴۶ ايالتونو کې چې راتلونکې نومبر مياشت انتخابات پکې کېږي ۳۳۸۱ ښځې ميدان ته راوتلې دي.

سېنزداک زياته کړې، يو زيات شمېر ښځو بيا د انتخاباتو په کمپاين کې د برخې اخېستو لپاره هم ځانونه راجسټر کړي دي.

د رېيبلېکن ګوند ښځينه غړې بيا د انتخباتو لپاره له خلکو د چندې ټولولو په چارو کې مخکې مخکې دي.

د پيو ريسرچ سنټر په نوم د يوې څېړنېزې ادارې د يوې نظر پوښتنې پايلې ښيي چې اکثريت امريکايي وګړي خوښ دي چې حکومتي څوکۍ د ښځو لاسو ته ورشي.

د نيو جرسي ايالت د پوهنتون استاده جين سېنزداک په دې اند ده چې په وروستيو کې په امريکا کې د (زه هم) په نوم د ښځو يو تحريک زياتې ښځې وهڅولې چې په سياست کې برخه واخلي.

د دې تحريک په ترڅ کې نومياليو اداکارو ښځو او نورو عامو هغو د امريکا او د نړۍ له خلکو سره هغه کيسې شريکې کړې چې ښيي، دوی څه رنګه د کار په ځايونو کې د سړيو له لاسه د جنسي ځورونې پېښو ښکار شوې.

سېنزداک زياته کړې، په انتخاباتو کې د زياتو امريکايي ښځو د دلچسپۍ يو بل لامل ښايي د امريکا د ولسمشر ډونلډ ټرمپ د ادارې هغه لانجمنه پرېکړه وي چې په ترڅ کې به يې د هغه هېواد خاورې ته په غير قانوني توګه داخل شوي کسان له خپلو اولادونو سره يو ځای کېدو ته پرېنښودل شي.

ځانګړې پاڼې

له موږ سره اړیکي

XS
SM
MD
LG