د پاکستانیو رسنیو د اګست پر ۲۲مه ویلي چې د هېواد اپوزیشن ګوندونه د نوي ولسمشر انتخاب په اړه اختلافات لري.
پاکستان تحریک انصاف د اوسني ولسمشر ممنون حسین د مودې له پوره کېدو سره سم، ډاکتر عارف علوي دندې ته نومولی.
په اپوزیشن کې پیپلز ګوند اعتزاز احسن د ولسمشرۍ څوکۍ انتخاب ته درولی دی.
خو د دې ګوند یوه مشر فرحت الله بابر رسنیو ته ویلي چې پر دې موضوع یې له مسلم لیګ (ن) سره اختلاف دی.
دی وايي، د جمعې پر ورځ په اسلام اباد کې د اپوزیشن د ټولو ګوندونو غونډه ده چې پکې به دوی هم برخه اخلي.
مسلم لیګ (ن) وايي، که یې له پیپلز ګوند سره د نوماند مسله هواره نکړای شوه نو به بیا عبدالقادر بلوڅ د ولسمشرۍ څوکۍ ته دروي.
