د اسلام اباد احتساب عدالت نن د پاکستان د پخواني وزيراعظم نوازشريف او د هغه د کورنۍ پرضد د دوو مقدمو اورېدنه وکړه.
نوازشريف چې دا وخت په اډياله زندان کې دی په زغروال ګاډي کې عدالت ته حاضر کړل شو.
جج ارشد ملک د العزيزيه او فليګ شپ نومې مقدمې واورېدلې او حکم يې ورکړ چې په راتلونکې اورېدنه کې دې د دغو مقدمو تحقيقاتي افسر حاضر شي.
عدالت د اګست تر ۱۵ مې اورېدنه وځنډوله او نوازشريف بيرته اډیاله زندان ته يووړل شو.
نوازشريف، د هغه لور مريم نواز او زوم کېپټن صفدر ته یې د جولای په شپږمه نېټه د احتساب عدالت د ايون فيلډ په مقدمه کې د بند سزاګانې اورولې وي او دوی درې واړه دا وخت په جيل کې دي.
