پښتون ژغورنې غورځنګ تر هغه وروسته د مظاهرو اعلان کړی چې د کراچۍ يوه عدالت په دغه ښار کې د وژل شوي وزيرستاني ځوان نقيب الله مسود په وژنه د تورن پوليس افسر راو انوار ضمانت په سېشنبه منظور کړ.
د نقیب مسود د وکیلانو ډله وایی دغه فېصله د انصاف په بنیاد نه ده شوې.
د پښتون ژغورنې غورځنګ مشر منظور پشتین په سېشنبه په یوه ویډیو کې د راو انوار د ضمانت منظورېدو او د حیات پرېغل د لادرکۍ خلاف نن د مظاهرو پیلولو اعلان کړی دی.
د ټولنیزو چارو فعال حیات پرېغال د جولاي په پنځمه د شپې ناوخته په ډېره اسماعیل خان کې له خپل کوره تښتول شوی دی او لا یې هم هېڅ درک نه لګېږي.
