د لاسرسي ځای

تازه خبر

خبرونه

محسن داوړ: ''ملګري مو تر اختر مخکې پرېږدئ, ګنې جرګه نه کوو''

پښتون ژغورنې غورځنګ یو غړی محسن داوړ.

پښتون ژغورنې غورځنګ وايي، که غړي یې خوشي نه شول نو له حکومتي جرګې سره شوي تړون ته به له سره کتنه کوي.

د یاد غورځنګ یو مخکښ محسن داوړ بېګا مشال راډیو ته وویل، که د دوی ملګري تر اختر وړاندې خوشې نه شو نو د دې مانا دا ده چې حکومتي جرګې په خپله کړې لوظنامه ماته کړه

د حکومتي جرګې غړي ملک خان مرجان مشال راډیو ته وویل، دوی هڅه کوي چې د پښتون ژغورنې غورځنګ پر غړیو لګول شوې قانوني دفعې لیرې کړي او ژر تر ژره د هغوی خوشې کېدل باوري کړي.

د پښتون ژغورنې غورځنګ او حکومتي جرګې ترمنځ د سېشنبې په ورځ هوکړه وشوه چې غورځنګ به د اختر په درېمه د شمالي وزیرستان په رزمک کې اعلان کړې جلسه ځنډوي او حکومتي جرګه به یې په بدل کې نیول شوي غړي خوشې کوي.

د نننۍ ورځې ټول خبرونه وګورئ

مزاحیه اداکار د اوکراين ولسمشريزې ټاکنې ګټلې

د اوکراين ولسمشر پېترو پوروشېنکو د ولسمشريزو ټاکنو په دویم پړاو کې ماته منلې او ولادمير زېلېنسکي ته یې په بریا مبارکي ورکړې ده.

په دې هېواد کې د ولسمشریزو ټاکنو لومړنۍ نتیجې ښيي چې ټېلېوېژني اداکار او ټوکمار ولادمير زېلېنسکي څه باندې ۷۳ فیصده او پوروشېنکو تر ۲۵ فیصده زياتې رایې تر لاسه کړې دي.

پوروشېنکو د اپريل پر ۲۱ مه نېټه د رایو بهیر سر ته تر رسېدو ورسته وويل چې سیاست نه پرېږدي.

د اوکراين د ولسمشرۍ انتخاباتو ګټونکي ولادمير زېلېنسکي تر بریا وروسته وویل چې د ولسمشر پېترو پوروشېنکو مننه کوي چې ورته یې مبارکي ويلې او د ملاتړ ډاډ يې ورکړی دی.

اوکراين له خراب اقتصادي وضعيت سره مخامخ دی او بل لور ته د هېواد په ختیځ کې له روسیې سره اوږدې لانجې لري.

زېلېنسکي چې مشهوره ټېلېوېژني څهره او ټوکمار دی، له خلکو سره يوشمېر ژمنې کړې دي.

سعودي چارواکي وايي پر تاڼه یې برید ناکامه کړی

سعودي چارواکي وايي، پر یوه تاڼه یې وسله وال برید ناکامه کړی.

د سعودي عرب دولتي ټېلېوېژن العربیه د سرچینو په حواله ویلي دي چې د اپرېل پر ۲۱مه څلور وسله والو په ریاض ولایت کې پر تاڼه برید وکړ خو سرتېرو څلور واړه ووژل.

ټېلېوېژن وايي، دا پېښه د ولایت په یوه وړوکي ښار زلفي کې شوې او زیاتوي چې بریدګر په وړو او لویو وسلو سمبال ول.
وسله وال وخت په وخت په سعودي کې امنیتي تنصیبات په نښه کوي.

ریاض یوه لسیزه وړاندې القاعده ډله وځپله.

د تازه پېښې ذمه واري چا نه ده منلې.

په مصر کې د اییني اصلاحاتو لپاره رایه اچونه پېل شوې

د مصر بیرق

د اپرېل پر۲۰مه په مصر کې د هغو اییني اصلاحاتو لپاره د درې ورځنی ټولپوښتنې په ترڅ کې رایه اچونه پېل شوې چې له مخې یې ولسمشر عبدالفتاح السیسي ته تر ۲۰۳۰ م کاله پورې د واک ورکولو اجازه ورکړل شي.

د وړاندېز شوو اییني بدلونونو له مخې به د السیسي د واک موجوده موده له څلورو کلونو تر شپږو کلونو پورې زیاته کړل شي او هغه ته د یو بل ځل لپاره هم د واک ورکولو اجازه ورکړل شي.

ناقدین وایي، د اییني ترامیمو له لارې به په سیاست کې د پوځ رول زیات کړل شي او ولسمشر ته به پر عدلیې د نور واک لرلو اجازه ورکړل شي.

د مصر پارلېمان چې پکې د ولسمشر السیسي زیات پلویان موجود دي، د اپرېل پر ۱۶مه یې د اصلاحاتو په حق کې رایې ورکړې.

د بشري حقونو فعالانو پر دې اییني بدلونونو تنقیدونه کړي دي.

کوسوو وايي ، ۱۱۰ وګړي یې له شامه ستانه شوي دي

پولیس له شامه په ستنېدونکو پسې روان دی

د کوسوو چارواکي وايي، ۱۱۰ وګړي یې له شام څخه خپل هېواد ته بیرته راغلي چې پکې د داعش ډلې څلور مشکوکه وسله وال هم شامل دي.

د کوسوو پولیسو مشر راشیت کلاج نن یوې خبري غونډي ته وویل، په ستنو شوو کسانو کې ۳۲ ښځې او ۷۴ ماشومان دي.

د نوموړي په خبره، په دې کې څلور ماشومان بیا داسې دي چې د شام په جګړه کې یې میندي او پلرونه وژل شوې دي.

کلاج وايي، اوس هم په شام کې د کوسوو ۴۹ ښځې، اته ماشومان او ۳۰ جنګیالي پاتې دي.

د کوسوو د انصاف وزیر ابیلراد طاهري ویلي، چارواکو د تېرو څو میاشتو راهیسي د دې ۱۱۰ کسانو د بیرته راتللو په اړه هڅې کولې.

نوموړي زیاته کړه، دا کار د امریکا د نیږدې همکاری له امله شوی دی.

داسې جوړ جاړی په کار دی چې په افغانستان کې جګړه ختمه کړي: شناهن

د امریکا دفاع سرپرست وزیر پېټرک شناهن.

د امریکا دفاع سرپرست وزیر پېټرک شناهن او د افغانستان سولې په اړه د امریکا د بهرنیو چارو وزارت ځانګړي استازي زلمي خلیلزاد د افغانستان د سولې پر مزاکراتو خبرې کړي دي.

پېټرک شناهن د اپرېل پر ۱۹مه په یوه ټوېټ کې لیکلي چې په افغانستان کې د تلپاتې سولې په اړه په پنټاګون کې خبرې شوي.

نوموړی ليکي: "موږ به ګډ کار کوو چې د داسې سیاسي جوړ جاړي لپاره شرایط برابر شي چې په افغانستان کې روان جنګ پای ته ورسوي".

ټاکل شوې وه چې د اپرېل پر۲۰مه د افغانستان یو ۲۵۰ کسیزه پلاوی په قطر کې له طالبانو سره خبرې وکړي. خو د افغان ولسمشر دفتر د اپريل پر ۱۸مه په یوه بیان کې وویل چې د قطر حکومت د دې پلاوي په منلو کې پاتې راغلی نو ځکه یې دغه غونډه لغوه کړه.

د شمالي وزیرستان تجاران وايي ، حکومت دې د وران شوي جایداد تاوان ورکړي

د میر علي بازار

د شمالي وزیرستان کاروباريان وايي که حکومتي مرستې ورنکړل شوې نو بيا به په احتجاج لاس پورې کړي.

دا خبره د شمالي وزيرستان د تاجرانو د اتحاديي يو مشر ذهين الله د اپرېل پر ۱۹مه په پېښور کې مشال راډیو ته وکړه.

ده وویل چې تېر کال يې په اسلام اباد کې خپله دهرنه پر دې ختمه کړې وه چې حکومتي او پوځي چارواکو ورته باور ورکړ چې ډېر زر به ورسره مرستې وشي خو د ده په وینا تر اوسه ورسره نه دي شوي.

نوموړی ادعا کوي چې د وسله والو پرضد په ضرب عضب عملياتو کې د دوي په زرګونه دکانونه وران شوي او د اته اربه درې شپېته کروړه روپو تاوان يې شوی دی.

د خیبر پښتونخوا د وزیراعلی ویاند اجمل وزیر د اپرېل پر ۱۹مه مشال راډیو ته وویل چې له وزیراعظم عمران خان سره یې په دې اړه خبرې کړې دي او ډېر زر به دوي ته تاوان ورکړل شي.

جماعت اسلامي: بلدیاتي نظام کې بدلون د ستونزو سبب کېدای شي

د خیبر پښتونخوا اسمبلۍ

د پاکستان جماعت اسلامي ګوند د خیبر پښتونخوا د حکومتي کابینې له خوا په بلدیاتي نظام کې د بدلونونو په اړه انديښنه ښودلې دي.

د جماعت اسلامي صوبايي مشر مشتاق احمد خان د اپرېل پر ۱۹مه په پېښور کې مشال راډیو ته وویل چې له بلدیاتي نظام څخه د ضلعي ډهانچې لرې کولو او دا یوازې تر ‏تحصیل او کلیو محدودول به بلدیاتي ‏ادارې کمزورې کړي.

مشتاق احمد خانوویل چې له دې سره به د ده په وینا ، خلکو ته ستونزې پېدا شي.

بلخوا صوبايي حکومت ويلي دي چې اپوزيشن ګوندونه دېپه صوبايي اسمبلۍ کي د دې بدلونونو په اړه خپل ‏تحفظات دوي ته وړاندي کړي.

پاکستان وايي، اورماړه کې د ۱۴ کسانو وژونکي له ايران سره تعلق لري

د پاکستان د بهرنیو چارو د دفتر ویاند ډاکټر محمد فیصل

پاکستان وايي ، د بلوچستان په اورماړه کې د ۱۴ کسانو وژونکي وسله وال له ايران سره تعلق لري.

د پاکستان ډان او نورې رسنۍ وايي ، دا خبره د پاکستان د بهرنيو چارو دفتر له خوا په اسلام اباد کې ايرانۍ سفارتخانې ته په لېږل شوې احتجاجي مراسله کې شوې ده.

که څه هم ايران پر دې اړه څه نه دي ويلي خو له دې مخکې ايران بيا په خپله ځمکه د وسله والو بريدونو لپاره پاکستان ميشته ډلې تورنې کړې دي.

د اپريل په ۱۸ مه د بلوچستان په اورماړه کې وسلوالو څوارلس کسان له بس څخه راکوز کړل او په ډزو يې ووژل.

دا په داسې حال کې ده چې د پاکستان وزيراعظم عمران خان په دوه ورځني سفر د اپرېل پر ۲۱مه ايران ته ځي.

د خیبر پښتونخوا کابینې د ښاروالۍ حکومتونو په قانون کې ترمیمونه کړي

د خېبر پښتونخوا کابینې د بلدیاتي ادارو په قانون کې ترمیمونه کړي. په پېښور کې د کابینې تر پرونۍ غونډې وروسته د بلدیاتي چارو وزیر شاهرام تره کي مشال راډیو ته وویل، په نوې مسوده کې د ضلعې ناظمانو او ضلعي کونسلو ختمولو ویل شوي دي.

دی وايي، له بدلونونو سره سم، تحصیل ناظمان به د ولس په مستقیمو رایو انتخابېږي.

تره کي زیاتوي چې په قانون کې له بدلون سره به د کلیو او ښارونو د شوراګانو غړو شمېر کم شي.

د اطلاعاتو وزیر شوکت یوسفزی وايي، صوبايي حکومت غواړي د بلدیاتي ادارو نظام پیاوړی کړي.

ټاکل شوې چې حکومت د اپرېل پر ۲۲مه د بلدیاتي ادارو په نظام کې د بدلونونو مسوده د خېبر پښتونخوا اسمبلۍ ته وړاندې کړي.

انسټاګرام د ایران انقلاب ساتونکي ځواک د ځینو کمندانانو اکاونټونه تړلي

د ایران امنیتي سرتېري.

ټولنیزې شبکې انسټاګرام د ایران د پاسداران انقلاب ځواک د یوشمېر کماندانانو اکاونټونه تړلي.

د انسټاګرام په وینا دا پریکړه يې په ایران کې له امریکايي بندیزونو سره سمه کړې

د امریکا ولسمشر ډونلډ ټرمپ د اپریل پر اتمه د ایران د پاسداران انقلاب ځواک یو بهرنې ترهګر سازمان وګرځاوه.

په ایران کې ټولنیزې شبکې فیسبوک، ټویټر، ټیلي ګرام میسینجر په رسمي توګه د بندیزونو د لاندې دې او انسټاګرام یوازینې ټولنیزه پاڼه وه چې د ایران خلکو کاروله.

د پاکستان خزانې وزیر اسد عمر خپله څوکۍ پرېښوده

د پاکستان د خزانې وزیر اسد عمر

د پاکستان خزانې وفاقي وزیر اسد عمر د خپلې څوکۍ پرېښودو اعلان کړی دی.

د اپرېل پر ۱۸مه نوموړي پر خپل ټویټر لیکلي دي، وزیر اعظم غوښتل چې 'زه د خزانې وزارت پرېږدم او د انرجۍ وزارت واخلم' خو هغه د وزارت نه اخيستو پرېکړه کړی او په دغه اړه يې د وزیر اعظم منظوري تر لاسه کړې.

له دې وړاندې په پاکستان کې د خزانې وزارت او کورنیو چارو په وزارت کې د بدلون راپورونه خپاره شوي وو، د اطلاعاتو وفاقي وزیر فواد چودري دغه راپورونه رد کړي دي.

د حکومت لخوا په رسمي توګه لا څه نه دي ویل شوي.

روس دې د سربیا او کوسوو په خبرو کې پراخه ونډه واخله: داڅیڅ

روس: د سربیا بهرنیو چارو وزیر اویڅا داڅیڅ له خپل روسي سیال سرګې لاوروف سره د اپرېل پر ۱۷مه (۲۰۱۹ کال) په مسکو کې ولیدل.

سربیا وايي چې روسیه دې د دغه هېواد او کوسوو ترمینځ د اروپايي ټولنې په مرسته کېدونکو خبرو اترو کې لوی کردار ولوبوي.

په چارشنبه په ماسکو کې له خپل روسي سیال سرګې لاوروف سره تر خبرو وروستو د سربیا د بهرنیو چارو وزیر اویڅا داڅیڅ وویل، سربیا له روسۍ مرستې پرته د خپلو ریاستي ګټو دفاع نه شي کولی.

نوموړي زیاتوي چې روسیه يې تر ټولو لوی دوست دی او د هغه له مشوری پرته به هېڅ هم نه کوي.

په کوسوو کې زیات البانیان اوسېږي چې په ۱۹۹۸-۹۹ کې يې د ناټو تر بمبارۍ او جنګ وروستو له سربیا لارې بېلې کړې.


د دواړو هېوادونو ترمینځ اړیکې عادي حالت ته د راوستلو لپاره د اروپايي ټولنې په مرسته روانې خبرې تر هغه پس ودرېدلې چې کوسوو پر سربیايي شیانو د ۱۰۰ فیصده ټېکسونو له معافولو انکار وکړ.

سربیا غواړي چې د مذاکراتو تر بیا پیلېدو وړاندې دې وړومبی دغه ټېکسونه لیرېکړل شي.

پرتګال کې د بس له لوېدو ۲۸ تنه وژل شوي

په پرتګال کې د یوه مسافر وړونکي بس

په پرتګال کې چارواکي وايي، په ماديرا سيمه کې د سېلګرۍ يو بس په چپه کېدو کې ۲۸ کسان مړه شوي دي.

د دې سيمې ښاروال، فيليپ سوزا ويلي چې د اپرېل په ۱۷مه په دې پېښه کې ډېری وژل شوي کسان، د جرمني سېلانیان وو.

هغه زیاتوي چې په دې بس کې ۵۵ کسان سپاره ول چې په يوه غرنۍ لاره وښويېد او ولوېدلو.

چارواکي وایې د پېښې د علت په اړه تحقیقات کوي.

مادیرا د اروپایې وګړو د رخصتيوو لپاره یو مشهور تفریحي ځای دی.

نتنیاهو د څلورم ځل لپاره د اسراییل وزیر اعظم شو

د اسراییل وزیر اعظم بینیامین نیتنیاهو.

د اسراييلو ولسمشر د اپرېل پر۱۷مه بنيامين نتنياهو په رسمي توګه په مسلسل ډول د څلورم ځل لپاره د وزير اعظم په حېث ونوماوه.

نتنیاهو په ټوله کې د پنځم ځل لپاره وزير اعظم انتخابېږي.

د نتنیاهو لیکود ګوند او د هغه ښې اړخي متحدينو تېره اونۍ په پارلېماني انتخاباتو کې اکثریت چوکۍ وګټلې.

د اسراییل ولسمشر ريوون ریولین نتنیاهو ته دنده ورکړه چې په راتلونکو ۴۲ ورځو کې اتحادي حکومت جوړ کړي.

که نتنیاهو په دې موده کې ایتلافي حکومت جوړ نه شي کړلی، د نوموړي انتخاباتي سیال د بلو اينډ وايټ ګوند مشر بيني ګانټز ته به د حکومت جوړولو موقع ورکول کېږي.

افغانستان کې د شکنجه کولو کچه کمه شوې ده: ملګري ملتونه

ملګري ملتونه وايي په افغانستان کې د هغو کسانو د شکنجه کولو د مخنیوي په هڅو کې حوصله بخښونکی پرمختګ شوی دی چې د روانې جګړې په تړاو نیول شوي دي.

دا خبره د ملګرو ملتونو د مرستندویه ماموریت او د ملګرو ملتونو د بشري حقونو دفتر د اپرېل پر ۱۷مه په خپل تازه رپوټ کې کړې ده.

رپوټ لیکي چې افغان حکومت د ځورونو ختمولو لپاره د خپل پلان په عمليکولو کې پرمختګ کړی دی خو لا هم ډېر کار پاته دی.

په دې رپوټ کې د ۲۰۱۷م کال د جنورۍ له لومړۍ نېټې د ۲۰۱۸ کال د ډسمبر تر ۳۱مې د ۲۸ ولایتونو په ۷۷ مرکزونو کې له بندي ۶۱۸ کسانو سره خبرې شوې دي.

د رپوټ په وینا ، وهل د شکنجه کولو تر ټولو زیاته کارېدونکې طریقه بلل شوې ده.

زیاتره بندیانو ویلي چې دوي د دې لپاره وهل کېږي چې جرم ومني او چې کله یې ومني بیا یې وهل ودرول شي.

د نوتردام کلیسا بیا رغوو: مکرون

د فرانسې په مرکز پاریس کې د نوتردام د کلیسا یو انځور چې اور په‌کې لګېدلی دی

د فرانسې ولسمشر ژمنه کړې چې نوتردام کلیسا به په پنځو کلونو کې بیا ورغوي.

امانویل مکرون د اپرېل پر ۱۶مه شپه یوه ټلویزیوني وینا وکړه: "زه نن په ټول قوت تاسو ته وایم چې موږ معماره خلک یو. ډېر شیان بیا رغونې ته لرو نو ځکه به موږ نوتردام کلیسا تر پخوا ښه ورغوو. زه غواړم دا کار په پنځو کلونو کې وشي."

د نوتردام کلیسا د اپرېل پر ۱۵مه ناوخته اور واخیست.

اور چې ۱۵ ساعته یې دوام وکړ د نوتردام د کلیسا د چت او منار په شمول زیاتې برخې وسوځولې.

شرکتونو او سوداګرو د دې اته نیم سوه کلنې لرغونې ودانۍ د بیارغونې لپاره تر اوسه د ۹۰۰ او ۱۳ لسو میلیونو ډالرو ژمنه کړې ده.

سوات کې یوه بله ښځه د ناموسي وژنې ښکار شوه

کمېشن وايي د ښځو د وژنې۵۱ پېښې یې هم ثبت کړې دي.

د سوات د مینګورې بڼ تاڼې پولیس مشر طارق خان د اپریل پر ۱۶مه مشال راډیو ته وویل، د پلټنو وروسته ورته مالومه شوې چې د چارسدې دغه ښځه خپلو وروڼو وژلې ده.

په سوات کې د ښځو د حقونو لپاره کارکونکي تنظیم شرکت ګاه په پېښه خپګان څرګند کړی دی.

د تنظیم مشرې نیلم رحیم د اپریل پر۱۶مه مشال راډیو ته وویل په سوات ناموسي وژنې کېږي چې بیا وروسته ورته ځان وژنې نوم ورکول کېږي.

نوموړې وویل، په داسې کیسونو کې ځینې تورن کسان نیول کېږي خو سزا ورته نه ورکول کېږي چې له امله یې ناموسي وژنې زیاتي دي.

افغانستان: سېلاوونو ۱۳۴ تنه وژلي او نېږدې ۹۰۰۰ کورونه یې ویجاړ کړي

په افغانستان کې سېلاوونه.

د افغانستان طبعي پېښو سمبالولو وزارت ویاند محمد قاسم حیدري د اپرېل پر ۱۶مه مشال راډیو ته وویل، د کابل په ګډون په ۲۰ ولایتونو کې له تېرو ۲۰ ورځو راهیسې بارانونو او سېلاوونو ۱۳۴ تنه وژلي دي.

هغه وویل،۶۱ کسان ژوبل او ۳۸ نور ورک دي. همدا راز نهه زره کورنو ته زیان اوښتی دی چې پکې تر څلور نیمو زرو زیات په بشپړه توګه ویجاړ شوي دي.

ولسمشر اشرف غني بېګا اړونده چارواکو ته امر کړی چې له سېلاب ځپلو سره مرستې پېل کړي.

د کابل سیند پر غاړه به ډانګې ووهل شي

آرشیف، د افغانستان ولسمشر محمد اشرف غني

د افغانستان ولسمشر محمد اشرف غني د کابل ښار د کلا واحد په سیمه کې له سېلاو ځپلو کورنیو سره د مرستو ژمنه وکړه.

نوموړي د اپرېل په ۱۶مه یوې ولسي غونډې ته وویل، له هغو کسانو سره به چې په‌ دې سیمه کې یې د کابل سیند غاړې نیولې دي، قانوني چلند وشي.

ولسمشر له خلکو سره ژمنه وکړه چې د کابل سیند پر غاړه به ډانګې ووهي چې د اوبو اوښتو مخه ونیول شي.

ولسمشر ویلي چې د ښار په پنځمه او شپږمه ناحیه کې ۱۲۰ کورنۍ به چې کورونه‌ یې سېلاو وړي، په نورو سیمو کې ځای کړي.

'د لیبیا په جګړو کې شاوخوا ۱۴۷ کسان وژل شوي'

د لیبیا د حکومتي ځواکونو انځور

د روغتیا نړیوال سازمان وايي چې د لیبیا پر پلازمېنې طرابلس د ولکې په مقصد د ښکېلو ډلو ترمنځ په نښتو کې تر دې دمه ۱۴۷ کسان وژل شوي دي.

د ملګرو ملتونو دا اړونده اداره همداراز وايي، ۶۱۴ نور کسان له هغه مهاله چې د لیبیا د ملي پوځ په نوم وسله‌والې ډلې د اپرېل پر پنځمه خپل پراخ عملیات پیل کړل، ټپیان شوي دي.

په لیبیا کې د «WHO» دفتر د اپریل پر ۱۵مه د جګړې پر ښکېلو خواوو غږ وکړ چې له زغم څخه کار واخلي او روغتونونو، امبولانسونو او روغتیايي کارکوونکو ته له زیان اړولو ډډه وکړي.

ملګري ملتونه وايي، یوازې په یوه وروستۍ ورځ ۲۵۰۰ ملکي وګړي د جګړو له کبله د خپلو مېنو پرېښودو ته اړ شوي چې له دې سره د کورنیو بېځایه شویو خلکو ټول شمېر له ۱۸ زرو اوړي.

لیبیا د دوو موازي حکومتونو ترمنځ وېشل شوې ده چې یو د هېواد په ختیځ او بل په لوېدیځ کې واکمن دی او دواړه ملېشه ډلې لري.

ایران کې سېلاوونو لسګونه کسان وژلي

ایراني چارواکو پرون وویل په تیرو څو اوونیو کې سېلابونو په دغه هېواد کې په لسګونه کسان وژلي او دوو اعشاریه دوه اربو ډالرو زیان یې اړولی دی.

د چارواکو په وینا د هېواد په خوزیستان صوبه کې پنځه او ایلام صوبه کې د یو تن په مړ کېدو د سېلابونو لوجې د مړو شمېر ۷۶ ته ورسیده. دا سېلابونه د مارچ له ۱۹ مې راهیسې شروع شوي دي.

یادې دواړه صوبې چې په عامه توګه شاړې دي، سېلابونو ډېرې متاثره کړې او په لکونو خلک یې له کلیو او ښارونو په وتلو مجبوره کړي دي. په دې کې ودانیو، سړکونو او کرهڼې ته ډېر زیات تاوان رسېدلی دی.

د ایران سرکاري خبري ایجنسۍ ارنا وايي د کورنیو چارو وزیر عبدالرضا رحماني فضلي پارلېمان ته ویلي دغو سېلابونو د هېواد په ۳۱ صوبو کې ۲۵ متاثره کړي چې پکې په ټول هېواد کې له ۴۴۰۰ زیات کلي ځپل شوي دي. نوموړي زیاته کړې چې د اندازو ترمخه د سېلابونو له وجې له دوه اعشاریه دوو څخه تر دوه اعشاریه شپږو اربه ډالرو تاوان اوښتی دی.

خوست: د وراباڼو وژونکي خودکشي کړې

ارشیف، د خوست په روغتون کې یو ټپي , May 6, 2018.

نن د دوشنبې په ورځ د خوست امنیتي چارواکو وویل، هغه کس چې تېره شپه يې په تڼیو کې یې پر وراباڼو برید کړی وو، نن ماسپښین يې خپلځان وواژه.

د خوست د امنیه قوماندانۍ د رسنیز دفتر مسوول مشال راډیو ته وویل، چې بریدګر د خوست مرکز اړوند د پنزايي په کلي کې خپل کور ته راغلی وو، چې پولیسو له خبر سره سم د هغه کور محاصره کړ، خو تورن کس پولیسو ته د ځان سپارلو پرځای خودکشي وکړه.

د سرچینې د مالوماتو له مخې نوموړي کس په خپل کلاشینکوف ځان وژلی دی.

د امنیه قوماندانۍ ویاند وايي، چې نوموړي کس تېره شپه د تڼیو په دره ګي کلي کې د نشې په حال کې د واده پر وراباڼو برید کړی وو، چې درې کسان يې وژلي او ۱۳ کسان يې ټپیان کړي ول. او له برید پس تښتېدلی وو.

په لغمان کې هاوان چاودنې اووه ماشومان وژلي دي

د لغمان مرکز مهترلام کې په هاوان چاودنه کې ژوبل ماشومان تر درملنې لاندې دي. ۱۴م اپرېل

په لغمان ولایت کې په یکشنبه ماښام د هاوان مرمۍ د چاودنې له امله ۷ ماشومان وژل شوي دي.

د لغمان د والي ویاند اسدالله دولتزي ازادي راډيو ته وویل چې د لغمان مرکز اړوند د بسرام په سيمه کې د هاوان مرمۍ پر ماشومانو چاودلې ده.

هغه وویل، اووه ماشومان یې وژلي او ۱۰ نور کسان ټپيان کړي دي.

د پېښې ټپيان د لغمان مرکزي روغتون ته وړل شوي دي.

امریکا وايي ایران یو نړیوال خطر دی

د امریکا د بهرنیو چارو وزیر مایک پامپیو وايي،ایران یو نړیوال خطر دی او په دې خبره کې دوی هېڅ ډول شک نه لري چې دغه هیواد په لاطیني امریکا کې مالي موجودیت لري.

نوموړي د اپریل پر ۱۳مه، له امریکا غږ سره په یوه مرکه کې وویل، ایرانۍ پېسې په لاطیني امریکا کې د ناوړه مقاصدو لپاره استعمالېږي چې پکې د حزب الله تر څنګ د نړیوالو جرایم پېشه ډلو او په ټوله سېمه کې د ترهګرۍ ملاتړ شامل دی.

پامپیو د هغو پروازونو یادونه هم وکړه چې تېره اوونۍ له تهران څخه نېغ په نېغه د لاطیني امریکا کراکس ته شروع شوي دي.

د ماهان اییر په نوم پر دغه هوايي شرکت باندې د منځني ختیځ د جګړې سېمو ته د پوځي ساز و سامان وړلو په تور واشنګټن بندیزونه لګولي دي.

پامپېو هم دا راز وویل، امریکا ایران ته په نړۍ کې د ترهګرۍ سره د تر ټولو لوی ملاتړکوونکي هیواد په توګه ګوري.

تهران د نوموړي د دې څرګندونو په اړه لا هم څه نه دي ویلي.

نیپال: د الوتکې حادثه کې اووه کسان مړه او ژوبل شوي

په نیپال کې د یوې الوتکې په حادثه کې لږ تر لږه درې تنه وژل شوي او څلور ژوبل شوي دي.

د نیپال د هوابازۍ ادارې چارواکي وايي، دا پېښه د اپریل پر ۱۴مه، د هېواد د ایورسټ سېمې په هوايي ډګر کې هغه مهال وشوه چې یوې وړې الوتکې د سر ښار کټمنډو نه د الوت لپاره تیاري نیوله خو په هوايي ډګر کې د ولاړ یو هیلي کاپټر سره وجنګېده.

چارواکي وايي، الوتکه د زغاست لیکې یا «رن وی» څخه د ښوییدو له کبله د هیلي کاپتر سره جنګېدلې ده.

د چارواکو په وینا په مړیو شویو کې یو د دې جهاز پایلټ دی او دوه پولیس چارواکي دي چې د هیلي کاپټر خواته ولاړ وو.

د هوايي ډګر چارواکي وايي چې په دې پېښه کې ژوبل شوي څلور واړه کسان په هیلي کاپټر کې د کټمنډو مرکزي هسپتال ته وړل شوي او حالت یې له خطرې بهر دی.

نور پورته کړئ

ځانګړې پاڼې

د مشال ځانګړې پاڼې

له موږ سره اړیکي

XS
SM
MD
LG