ولسمشر ټرمپ ویلي، هغه په دې اړه ډېر ژر پرېکړه کول غواړي چې له شامه امریکايي ځواکونه وباسي او که نه؟
د سېشنبې په ورځ په واشنګټن کې د درېو بالټیک هېوادونو له ولسمشرانو سره یوې خبرې غونډې ته وویل، تر کومه چې د شام خبره ده نو هلته زموږ بنیادي هدف له اسلامي دولته ځان خلاصول وو.
موږ دغه کار سر ته رسولې دی او په دغه اړه به د سیمې له نورو هېوادونو سره په همکارۍ دا پرېکړه کوو چې وړاندې به څه کوو.
ولسمشر ټرمپ وویل، غواړي چې له شامه بهر شي، ځواکونه کور ته ستانه کړي او د ملت په بیا جوړونه کار پیل کړي.
امریکا په شام کې د هغه ځانګړیو ځواکونو په ګډون چې د کردانو د جمهوریت پلوه ځواکونو لارښودنه او مرسته کوي ۲۰۰۰ ځواکونه ځای په ځای کړي دي.
