د مالاکنډ ډویژن د هاي کورټ بار ایسوسي ایشن مشر شمشیر علي خان ایډوکیټ مشال راډیو ته وویل وکیلان به نن د احتجاج په توګه عدالتونو ته نه حاضریږي.
شمشیر علي خان ایډوکیټ وویل چې دوی د پښتون ژغورنې غورځنګ په ملاتړ کې د بلوچستان د وکیلانو ملګري دي او د هغوی په غوښتنه یې نن یانې د پنجشنبې په ورځ له عدالتونو بایکاټ کړی دی.
د ملاکنډ بار اېسوسیېشن وکیل او د سوات قامي جرګې غړي اېډوکېټ سید کریم شلماني وویل ، دوی د پښتون ژغورنې غورځنګ د غړو پرضد درج شوې مقدمې غیرقانوي بولي او غندنه یې کوي.
د سوات بار اېسوسیېشن پخوانی مشر اصغر خان وايي ، که څه هم له دې هړتال څخه ولس ته مشکلات جوړېږي خو باید برداشت کړل شي ځکه چې دا هړتال د یو ښه مقصد لپاره شوی دی.
دا له هغه ویوه ورځ ورسته ده چې د بلوچستان وکیلانو د چارشنبې په ورځ په ټوله صوبه کې له عدالتونو بایکاټ کړی وو.
د بلوچستان بار اېسوسیېشن مخکښ اېډوکېټ منیر احمد کاکړ مشال راډیو ته ویلي وو چې دوی تیار دي چې په عدالتونو کې د پښتون ژغورنې غورځنګ د غړو دفاع وکړي.
د ږوب او کلاسیف الله پولیسو د مارچ پر ۱۳مه نېټه هلته د پښتون ژغورنې غورځنګ د غړو او د هغوی په احتجاجي غونډو کې د ګډون کوونکو پرضد رپوټونه درج کړل.
تر ږوب او کلاسیف الله وروسته په کوټه کې هم پولیسو ورته رپوټ درج کړی دی. په دې رپوټونو کې د پښتونخوا ملي عوامي ګوند او عوامي نشنل ګوند ځینې مشران هم شامل دي.
پولیسو په درج کړو رپوټونو کې تور پورې کړی چې دې کسانو د پښتون ژغورنې غورځنګ په غونډو کې د ریاست او ریاستي ادارو پرضد ویناوې شوې دي.
په عین حال کې د بشري حقونو د څار نړیوالې ادارې د پاکستان پر حکومت غږ کړی دی چې د پښتون ژغورنې غورځنګ د مشرانو پر ضد مقدمې بیرته واخلي.
د پښتون ژغورنې غورځنګ د مارچ له نهمې تر ۱۱ په ږوب ، کلاسیف الله او کوټه کې پراخې احتجاجي غونډې وکړې او پر حکومت یې غږ وکړ چې ورسره کړې ژمنې دې پوره کړي.