پراګ - د سوات د خوازه خېلې ټاڼې پولیس وايي، د اتوار پر ورځ یې د ځېنو مظاهره کوونکو پر ضد پرچه دایره کړې ده.
د تاڼې یوه پولیس افسر د ګل یا دوشنبې پر ورځ مشال راډیو ته وویل، د شپږو کسانو پر ضد یې د ریاست خلاف د نعرو وهلو او د خلکو پارولو دفعې درج کړې دي.
دې پولیس افسر د خپل نوم له ښودو ډډه وکړه ځکه چې له رسنیو سره یې د خبرو کولو اجازه نه لرله.
د یکشنبې پر ورځ سلګونه کسانو په سوات کې پر امنیتي پوستو د ځورونو خلاف مظاهره وکړه او غوښتنه یې وکړه چې حکومت دې چېک پوسټونه ختم کړي ځکه چې د دوی ژوند یې اغېزمن کړی دی.
د سوات خلک پر پوستو د ځورېدنې کیسې کوي
د مظاهرې یوه منتظم غیرت خان ویلي، د دوی د قانوني چارو ډله د پولیسو د اېف ای ار یا پرچې ځواب ورکولو تیاری کوي.
دی وايي، لا یې ګرفتارۍ نه دي ورکړې.
غیرت خان وايي، د ده او د دوو وروڼو احمد شاه یوسفزي او اېمل خان یوسفزي په ګډون پرچه د شپږو کسانو پر ضد درج شوې ده.
غیرت خان د پښتونخوا ملي عوامي ګوند د صوبايي مشر مختیار خان یوسفزي زوی دی.
په اېف ای ار کې د لطیف خان،حسین شاه او اظهار نومونه هم لیکل شوي.
نوموړی زیاتوي چې د مظاهرې منتظمانو متفقه فیصله کړې چې د پولیسو د ناروا پرچې او رویې پر ضد به بله مظاهره کوي خو لا یې نېټه نه ده ټاکلې.
د سوات د پولیسو مشر واحد محمود د یکشنبې یا اتوار پر ورځ پر امنیتي پوستو د ځورونو تور رد کړ او زیاته یې کړه چې وار له مخه یې د پوستو شمېر له ۹۷ څخه ۱۷ ته ښکته کړی.
