د لاسرسي ځای

تازه خبر

د خبریالانو د خوندیتوب ادارې – کمېټي ټو پروټکټ جرنلسټس – د پاکستاني حکومت له خوا هلته د مشال راډیو تړل کېده غندلي دي.

د یادې ادارې له خوا د جمعې په شپه له واشنګټن څخه په خپاره کړي بیان کې په اسلام اباد کې د مشال راډیو دفتر بندول په پاکستان کې “د صحافت ازادۍ ته یو ګواښ” بللی دی.

د اسیا لپاره د یادې ادارې مشر سټیون بټلر په دې بیان کې ویلي دي چې مشال راډيو په پاکستان کې د مالوماتو یوه مهمه سرچینه ده.

سټیون بټلر ویلي چې مشال راډیو باید بې د حکومت له نور فشاره په دې هیواد کې خپل کار پر مخ وړلو ته پریښودل شي.

د امریکا د بهرنیو چارو د وزرات یوې ویاندې د جمعې په ورځ ناوخته ویلي چې دوی په دې اړه رپوټونه لیدلي دي او له پاکستاني حکومت سره يې خپله فکرمندي شریکه کړې ده .

یاد وزارت زیاته کړې ده چې امریکا په ټوله نړۍ کې د رسنیو د ازادۍ مرسته کوي ځکه چې ازادې رسنۍ د جمهوري حکومت دارۍ اساس دی.

دا له هغه وروسته ده چې د پاکستان د کورنیو چارو وزارت د جنورۍ پر ۱۹مه نېټه په اسلام اباد کې د مشال راډیو دفتر وتاړی.

د مشال راډیو مشر محمد امین مدقق ویلي چې د پاکستان د کورنيو چارو وزارت ویلي چې دا ګام یې د دې هېواد استخباراتي ادارې - ای ايس ای - د رپوټونو پر اساس اخيستی دی.

د یاد وزارت له خوا په ورکړل شوي بیان کې د مشال راډیو د دفتر تړلو لامل پر راډیو له نشرېدونکو خپرونو ناخوښي ښودل شوې او تور پورې شوی چې مشال راډيو داسې خپرونې کوي کومې چې د دې هېواد د ګټو پرضد دي.

د ازادې اروپا راډيو مشر تامس کینټ د پاکستاني حکومت دا ګام غندلی دی او ویلي یې دي چې

دوی د پاکستانيو چارواکو د ارادو په اړه په بېړنۍ توګه د زياتو معلوماتو په لټه کې دي.

تامس کینټ زياته کړې چې مشال راډيو په پاکستان کې د خپلو اورېدونکيو لپاره د باوري او بې پلوه معلوماتو مهمه سرچينه ده.

نوموړي هیله څرګنده کړې ده چې دا ستونزه به بې له څه ځنډه هواره کړل شي."

XS
SM
MD
LG