د پاکستان پخوانۍ وزيراعظمې او د پيپلز ګوند د مشرې بېنظير بوټو لسم تلين نن نمانځل کېږي او دې لړ کې مرکزي دستوره به د سيند صوبې په ګړي خدابخش سيمه کې د هغې د مزار سره نزدې کېږي.
د پيپلزګوند د بېلا بېلو مشرانو ترڅنګ د نورو ګوندونو مشرانو هم بېنظير بوټو ته د پېغامونو له لارې د عقيدت پېرزونې وړاندې کړې دي او د هغې قرباني يې د جمهوريت د پياوړتيا په لور ګام ګرځولی دی.
بېنظير بوټو چې د اسلامي نړۍ د يو هېواد کم عمره او لومړۍ ښځينه وزيراعظمه وه، هغه په لومړي ځل په ۱۹۹۳م او بيا په ۱۹۹۶م کې د پاکستان وزيراعظمه ټاکل شوې وه.
د پوځي واکمن جنرل (ر) پروېزمشرف په وخت کې جلاوطنه شوې وه او د ۲۰۰۷م د اکتوبر په مياشت کې بېرته وطن ته راغله. د کراچۍ په کارساز سيمه کې د هغې د هرکلي په کاروان بريد شوی وو چې پکې له ۱۵۰ زيات کسان وژل شوي وو خو هغه بچ پاتې شوې وه. بيا په هم دغه کال د دسمبر پر ۲۷مه د راولپنډۍ په لياقت باغ کې د جلسي وروسته په ځانمرګې بريد کې ووژل شوه.
پيپلز ګوند هر کال د دسمبر پر ۲۷مه د هغې تلين نمانځي او پر دې مناسبت په ګړي خدا بخش سيمه کې د هغې د مزار سره نزدې يوه لويه غونډه کوي.
د بېنظير بوټو د لسم تلين پر مناسبت د پيپلزګوند د بېلا بېلو مشرانو له خوا د هغې پېغامونه هم جاري کړی شوې دي چې پکې هغې ته عقيدت پېرزونې وړاندې کړې شوې دي.
د پيپلزګوند چېرمېن او د بېنظير بوټو زوي بلاول بهټوزرداري له خوا جاري شوي بيان کې ويل شوي چې بېنظير بوټو د ښکته طبقې د ولس او جهموريت لپاره په کوششونو کې خپل پلار، وروڼه او مور له لاسه ورکړل خو هغه هڅې يې روانې وساتلې چې پلار نيکه يې پېل کړې وې.
د پاکستان پيپلز ګوند شريک مشر او پخواني ولسمشر اصف علي زرداري د بېنظیر بوټو لسم تلين په مناسبت په يو پيغام کې ويلي دي چې بېنظير بوټو د هغو عناصرو پرضد جګړه کوله چې د مذهب په نامه يې هېواد د يرغمال کولو کوشش کولو.
اصف زداري وويل چې بېنظر بوټو په پاکستان کې جمهوريت ته وده ورکړې وه او پيپلز ګوند د دې لپاره ډېرې قربانۍ ورکړې دي.
د پاکستان پخواني وزيراعظم سيديوسف رضا ګيلاني په خپل پېغام کې ويلي چې پاکستان نن د کومو ستونزو سره مخ دی د هغې د هواري لار بېنظيربهټو ته معلوم وو.
د سيند پخواني اعلا وزير او د بېنظير بوټو نزدې سياسي ملګري سيدقايم علي شاه په يو بيان کې ويلي چې هغه لکه د پلار يوه ښه لارښوونکې وه چې ګرانه ده نړۍ بيا د هغې په رنګ انسان وويني.
د ذکر دہ چې د بېنظير بوټو د مرګ ذمه واري وسله والې ډلې تحريک طالبان پاکستان منلې وه او دې لړ کې پينځه کسان نيول شوي هم وو خو عدالت د ثبوتونو د کمي په بنياد د هغوي د خوشې کولو امر جاري کړی وو.
پيپلزګوند بيا بيا تور لګوي چې د هغه وخت پوځي واکمن پروېزمشرف له خوا د پوره امنيتي ګامونو نه پورته کولو له وجېبېنظير بوټو وژل شوې وه خو پروېزمشرف دغه تورونه ردوي.
