د هرنايي اسسټنټ کمشنر حبیب نصیر د شنبې په ورځ مشال راډیو ته وویل ، چې دا پېښه د جمعې په ورځ رامنځ ته شوې ده او دوی له هغه وخته راهسې هڅه کوي چې تر ملبه لاندې شوي کسان را وباسي.
حبیب نصیر وویل ، تر اوسه یې د اوو کسانو مړي را اېستلي دي او دوه نور کسان لا هم هلته بند دي.
نوموړي وویل چې په دې پېښه کې یو بل تن برسېرن ټپی شوی وو.
د هرنايي یو ځايي خبریال عبدالمالک د وژل شوو کسانو د پژندګلوی په اړه مشال راډیو ته وویل چې دا کسان د خیبر پښتونخوا د سوات اوسېدونکي دي.
هرنايي هغه سیمه ده چې د کویلې زېرمې پکې ډېرې دي خو د ځايي خلکو په وینا ، هلته د کارکوونکو لپاره حفاظتي انتظامات د نه برابر دي.
د بلوچستان له هرنايي ، دوکۍ او یو شمېر نورو سیمو څخه هره ورځ په زرګونه ټنه کویله اېستل کېږي چې زیاتره یې پنجاب ته ځي.
په دې سیمو کې تر دې وړاندې هم د کانونو د نړېدو په پېښو کې په لوی شمېر کسان وژل شوي او ټپي شوي دي.
