د لاسرسي ځای

کندهار ته ګرځېدلیو طالب چارواکیو افغان جنګ پردی وباله


محمد الله خان او ملا عبدالروف

له هغو ۱۵ طالب مشرانو څخه چې په دا وروستیو کې یې د کندهار امنیه قوماندان جنرال عبدالرازق په هڅو خپلې کورنۍ له پاکستانه و افغانستان ته کډه کړې او عادي ژوند ته ګرځېدلي دي.په دوی کې دوو یې له ازادي راډیو سره د خپلو پخوانيو فعالیتونو او اوسني ژوند په باب خبرې کړې.

له دغو دوو پخوانیو طالب چارواکیو څخه یو یې د اقتصادي چارو کمېسیون پخوانی غړی ملا عبدالروف او بل یو یې محمد الله خان دي چې د ازادي راډیو له خبریال صادق ريښتیني سره تر خورا ډېرو هلو ځلو پس په سېشنبه خبرو کولو ته حاضر شول.

ملا عبدالروف له تېرو ۱۵ کلونو راهیسې په پاکستان کې د وسله‎والو طالبانو د اقتصادي کمېسیون غړی و.

ملا عبدالروف
ملا عبدالروف

نوموړي درې میاشتې مخکې له خپلې کورنۍ سره یوځای له پاکستانه و کندهار ته کډه شوی او اوس هلته په یوه خوندي او پرامنه سیمه کې له خپلې کورنۍ سره ژوند کوي.

ملا عبدالروف وايي، د سلطان محمد په نوم د جنرال عبدالرازق یوه ارتباطي کس ورته ډاډ ورکړی و چې په خوندي ډول به‌یې کندهار ته رسوي او هېڅوک به ورسره کار نه ‎لري.

هغه وویل، "خپلې مجبورۍراوستلو، دلته امنیت راوستلو،او د قوماندان صاحب [عبدالرزاق] ښه چلند راوستلو چې د دې سیمې له ولس سره ډېره ښه ګوزاره کوي، که طالب راځي هم غېږ یې ورته خلاصه ده که بلڅوک راځي هم غېږ یې ورته خلاصه ده. هو هلته [پاکستان] ډېر ستړي وو، مجبوره وو بالا، نور مو تر وس تېره شوه، هلته په «پاکستان» کې د خپل سر نه ‌وو، د بل تر لاس لاندې مو کار کاوه. "

ملا عبدالروف وايي، په پاکستان کې له فشارونو سره مخامخ وو او په دې پوهېدلو چې په افغانستان کې روانه جګړه پردۍ ده.

د نوموړي په وینا د ده په څېر لسګونه نورو طالب مشرانو هم دغه حقیقت درک کړی چې ځینې يې د ده په څېر عادي ژوند ته راګرځېدلي او دا بهیر روان دی.

ملا روف وايي، عادي ژوند ته تر ګرځېدو وروسته د خپلو پخوانیو ملګرو له‎خوا ګواښل کېږي خو ځینې بیا حال راسره نیسي او غواړي چې د ده غوندې عادي ژوند ته ستانه شي.

محمدالله خان یو بل طالب چارواکی دی چې تر ملا روف وروسته له پاکستانه و کندهار ته بیرته کډه شوی دی.

محمد الله خان
محمد الله خان

نوموړي دا هم وویل چې د ده غوندې د طالبانو نېږدې ۵۰ لوړپوړي چارواکي او په سلګونه نور عادي ژوند ته ګرځېدلي دي. د نوموړي په ادعا په راستنېدونکیو کې وزیران، د کمیسیونونو غړي، والیان او ولسوالان شامل دي.

دی هم ورته کیسه کوي او وايي چې د سلطان محمد په نوم د ژېړۍ، پنجوايي او میوند نظامي مسول چې د جنرال عبدالرازق ډېر باوري سړی دی دا ډاډ ورته ورکړی و چې په خوندي ډول به ‌یې کندهار ته رسوي او هېڅوک به ستونزې نه ورته جوړوي.

نوموړی د ځینو امنیتي دلایلو پر اساس خپله پخوانۍ دنده نه‌یادوي، خو دا کیسه کوي چې یو ځل په کندهار کې نیول شوی او شپږ کاله مخکې د سرپوزې د زندان تر ماتېدو وروسته بیرته پاکستان ته تللی وو.

"پر دې ووېرېدم چې سبا به ‌مې [پاکستان] دلته راوړوي، په کوټه کې مې قانوني اسناد نه لرل، نو دلته [افغانستان] کې مې هم خلک پېژني چې مخالف يې. له دې وهمه دلته راغلم. ډېر خلک‌ يې له کورنیو سره یوځای تر بارامچې راواړول په دې خاطر چې بې ابي را نه‎ شي نو له قوماندان صاحب سره مې تماس ونیولو."

د کندهار امنیه قوماندان جنرال عبدالرازقد شنبې په ورځ ازادي راډیو ته وویل چې د ملا عمر د کورنۍ یو شمېر غړیو په ګډون د وسله‎والو طالبانو ۱۵ مشران له خپلو کورنیو سره یوځای له پاکستانه و کندهار ته ستانه شوي دي.

د کندهار امنیه قوماندان جنرال عبدالرازق
د کندهار امنیه قوماندان جنرال عبدالرازق

د قوماندان په وینا د وسله‎والو طالبانو د لوړې او منځنۍ کچې په دغو مشرانو کې والیان د دفاع او بهرنیو چارو وزارت لوړپوړي چارواکي شامل دي.

قوماندان په دغو راغلیو طالب مشرانو کې د ملا لطف‎الله اغا، معلم فدا، محمدالله خان، ملا روف او ډاکتر خلیل نومونه یادوي.

د کندهار امنیه قوماندان پروسږ کال د ډسمبر په میاشت کې پر طالبانو غږ وکړ چې سولې ته غاړه کېږدي او دی حاضر دی چې له جګړې د راجلا شویو وسله‎والو امنیت وساتي.

وسله‎والو طالبانو د یوې اعلامیې په خپرولو سره کندهار ته د طالب مشرانو د سوله‎ییز راتګ دغه مسئله له حقیقته لیرې بللې ده.

راپور: محمدصادق رښتینی

د مشال ویډیوګانې، انځورونه

انځورونه، ویډیوګانې

تفصیل...
XS
SM
MD
LG