د لاسرسي ځای

یو ایرانی ډاکتر سره له کورنۍ امریکا ته له ننوتو منع کړل شو


پراګ - د سرطان ناروغۍ یو ایرانی متخصص چې په باسټن روغتون کې یې تازه دنده ترلاسه کړې امریکا ته روان وو خو خپل هېواد ته لېږدول شوی.

رسنیو ویلي چې هغه د سه شنبې په ورځ امریکا ته تر ننوتو وګرځول شو خو تر دې مخکې له خپلې کورنۍ سره یو ځای د امریکا د کډوالۍ چارو چارواکو نیولی هم وو.

باسټن ګلوب ورځپاڼې د امریکا د ګمرکاتو او سرحدي ګزمې (کسټمز اېنډ بارډ پیټرول) د ادارې د ویاندې سټیفني مالین په حواله ویلي چې ډاکتر محسن دهنوي، مېرمن یې او درې ماشومان یې د شپې ناوخته د لوګان هوايي ډګر ته ورسېد او له هم هغه ځایه یې ستون کړ.

د باسټن د ماشومانو روغتون او د کډوالۍ چارو د متخصصینو په حواله محسن دهنوي د شپږو عمدتاً مسلمانو هېوادونو په اتباعو د ولسمشر ډونالډ ټرمپ د اجرايي فرمان په خاطر نه بلکې په بلې پلمې نیول شوی او استول شوی دی.

د امریکا د کډوالۍ چارو مدافع وکیلانو د نیو انګلنډ څانګې مسوولې سوسان چرچ ویلي: ((په څه چې مونږ پوهیږو دا دي چې دا کسان د سفر د بندیز د فرمان په خاطر نه بلکې تر دې هم په کومه بله احمقانه پلمه ایستل شوي دي.))

د امریکا د ګمرکونو او سرحدي ګزمې د ادارې ویاند په دې اړه د سمدستي نظر ورکولو په خاطر ټیلېفون یا ایمیل ته ځواب نه دی ویلی.

دوه اوونۍ وړاندې د امریکا سترې محکمې د ایران، لیبیا، سومالیا، سوډان، سوریې او یمن د اتباعو په وړاندې د ولسمشر ډونالډ ټرمپ د سفر د بندیز د اجرايي فرمان اصلاح شوې بڼه تایید کړه.

په دې تایید سره هغه کسان چې په امریکا کې یې د کورنۍ نېږدې غړي ژوند کوي، د ښه نیت په پار، تر بندیز لاندې نه راځي او په خپله اجرايي فرمان هم په هغو کسانو د تطبیق وړ نه دی چې ویزې ولري.

ډونلډ ټرمپ د ولسمشرۍ په انتخاباتي کیمپېن کې امریکا ته د مسلمانانو په ورتګ د کامل بندیز لګولو غږ وکړ.

هغه وویل په کور دننه او بهر د اسلامپاله تندلارو د حملو د مخنیوي په خاطر د ملي امنیت لپاره دا کار کوي.

د دې نظریې مخالفینو د سفر د بندیز فرمان د امریکا په اساسي قانون کې د دین د ازادۍ د اصل خلاف وباله.

د ټرمپ اجرايي فرمان په جنوري کې خپور شو چې په هوايي ډګرونو کې یې ګډوډۍ پیدا کړې او ورپسې زرګونه کسانو یې پر ضد لاریون هم وکړ.

ستاسې نظر

تبصرې ښکاره کړئ

XS
SM
MD
LG