دا څرګندونې وزیراعظم نواز شریف د دوشنبې په ورځ سعودي عرب ته د یو ورځني سفر پر مهال کړې دي.
د وزیراعظم له دفتره په خپره شوې خبرپاڼه کې ویل شوي چې نواز شریف د دوشنبې په ورځ د سعودي عرب په جده ښار کې له باچا سلمان بن عبدالعزیز سره لیده کاته وکړل او په خلیجي هېوادونو کې د راپورته شوو حالاتو په اړه یې ورسره خبرې وکړي.
خبر پاڼه زیاتوي، باچا سلمان بن عبدالعزیز د وزیراعظم نواز شریف د سفر مننه وکړه او له پاکستان سره یې په خپلې همکاری ټینګار وکړ.
وزیراعظم نوازشریف سره په دې یوه ورځنۍ دوره کې د پوځ مشر جنرال جاوید باجوه او د وزیراعظم د بهرنیو چارو سلاکار سرتاج عزیز هم شامل وو.
دا په داسې حال کې ده چې سعودي عرب او د هغوی اتحادیانو پر قطر یو شمېر بندیزونه لګولي دي.
د قطر د بهرنیو چارو وزیر شیخ محمد بن عبدالرحمان ال ثاني د دې ګام غندنه کړې اودا بندیزونه یې غیر قانوني او غیرمنصفانه بللي دي.
شیخ محمد بن عبدالرحمان ال ثاني د دوشنبې په ورځ په پېرس کې له ځايي سفارتي چارواکو سره تر لیدو کتو ورسته خبریالانو ته مالومات ورکړل.
هغه وویل، دوي د قطر او خلیجي هېوادونو ترمنځ د کړکیچ کمولو لپاره د سفارتي هڅو ستاینه کوي.
خو د شیخ محمد بن عبدالرحمان ال ثاني په وینا ، هیڅوک هم د قطر د بهرنیو چارو پالیسۍ په اړه هدایات نشي ورکولای.
سعودي عرب ، متحده عربي اماراتو ، بحرین ، مصر او یو شمېر نورو اسلامي هیوادونو په روانه میاشت کې له قطر سره د اړیکو ختمولو اعلان وکړ.
دې هیوادونو پر قطر تور پورې کړ چې په سیمه کې له داسې سخت دریځو او ترهګرو ډلو سره مرستې کوي چې د دوي په وینا ایران یې هم تر شا ولاړی دی.
