د لاسرسي ځای

تازه خبر

هند: د حافظ سعيد خلاف د پاکستان ګامونه کافي نه دي


حافظ سعيد
حافظ سعيد

د هندوستان د بهرنيوو چارو وزارت په پرونۍ خبرپاڼه کې ويلي چې پاکستان پخوا هم داسې ګامونه اخيستي. د خبرپاڼې تر مخه د ترهګرۍ پر ضد به د پاکستان خلوص هله معلوم شي چې په ترهګرو بريدونو کې ښکېلو کسانو پر ضد ريښتيني کاروايي وکړي.

تېر مازیګر د پاکستان پوځ ويلي وو چې د حافظ سعيد نظربندي د دوی د پاليسۍ برخه ده او د ګل يا دوشنبې په ورځ کړی کار يې د ملي ګټو په ترڅ کې کړی دی. د پاکستان کورنیو چارو وزیر چوهدري نثار علي خان خبریالانو ته ويلي وو چې دا ګام يې د ملګرو ملتونو لخوا جماعت الدعوه د ترهګرې ډلې ګرځولو وروسته اخستی دی. ملګرو ملتونو په ۲۰۰۸ کال کې تر هغې وروسته جماعت الدعوه په ترهګرو ډلو کې شامله کړه چې هند پر دغې ډلې د ممبئ بريدونو کې د لاس لرلو تور پورې کړي. دې حملو کې ۱۶۴ کسان وژل شوي او ۳۰۸ زخميان شوي وو.

پاکستان په دې کار سره امريکې ته د شريک کار پيغام ورکول غواړي
حسن عسکري

د پنجاب صوبې د داخله محکمې د نوټیفیکېشن ترمخه جمات الدعوه او فلاح انسانیت تنظيمونه د څارنې یا واچ لسټ په لړ کې اچول شوي دي. د حافظ سعيد تر څنګ د دغو تنظيمونو څلور نور مشران (عبدا عبېد، ظفر اقبال، عبدالرحمان عابد او قاضی کاشف نیاز) د ترهګرې ضد قانون لاندې په حفاظتي تحویل کې اخیستل شوي دي.

د امنيتي چارو کار پوه حسن عسکري وایي د ناقانونه ګرځول شوو تنظمیونو د فعاليتونو له وجې پر پاکستان د امريکې فشار وو. هغه مشال ريډيو ته وويل: ((پاکستان غواړي دې سره دا پيغام ورکړي چې د نوي امريکايي ولسمشر ډونلډ ټرمپ ادارې سره شريک کار کول غواړي.))

ياده دي وي چې د پاکستان ځينو مطبوعاتو ليکلي چې د حافظ سعيد تر نظر بندۍ لږ مخکې د ولسمشر ټرمپ ادارې ځينو چارواکو پاکستان ته خبرداری ورکړی وو چې د وسله والو پر ضد دې کاروايي وکړي. اسلام اباد همېشه ويلي چې دوی د ترهګرو ډلو خلاف بې توپيره ګامونه اخيستي دي.

په پاکستان کې د حافظ سعيد خلاف مقدمې هم چليدلې دي. په ډيرو کې دی بري شوی دی. د قانوني چارو کار پوه افتخار ګیلاني وایي په ترهګرۍ تورنو خلکو خلاف بايد په څرګند ډول مقدمې وچلول شي. د هغه په وينا اوس چې حکومت حافظ سعيد نظر بند کړی نو پکار ده چې د ترهګرۍ ضد عدالتونو کې پرې مقدمه وچلول شي.

تېره ورځ د حافظ سعید نظر بندۍ خلاف د پاکستان په ځينو ښارونو کې د هغه ملاتړو مظاهرې کړې دي.

هندوستان په ۲۰۰۸ کال کې ممبئ کې شوي بريدونو زمه واري پر حافظ سعيد اچولې وه او له پاکستانه يې غوښتي چې د هغه او ځينو نورو ډلو خلاف دي سخت ګامونه واخلي. له همدې وجې امریکې په ۲۰۱۲ کال کې حافظ سعید د ترهګو په ليسټ کې شامل کړ او د هغه د نيولو لپاره يې لس ميلينه ډال انعام هم مقرر کړ خو نوموړي بيا هم پاکستان کې خپلو جلسو او فعاليتونو ته دوام ورکړ.

XS
SM
MD
LG