خوست/وزیرستان - د دوشنبې په ورځ د خوست د ګربزو ولسوالۍ د ګلان کيمپ څخه د وزیرستانیو کډوالو د بیرته ستنیدنې بهیر پیل شو.
یو قومي مشر سلیم داوړ مشال راډیو ته وویل، چې د کډوالو په اوله جوپه کې د پی خېل او محمدخېل د کلیو دوه سوه کورنۍ شاملې دي.د وزیرستان د کډوالو د مخې ښې لپاره د خوست یو شمیر ملکي چارواکي د ګلان کيمپ ته ورغلي دي.
هره ورځ به ۲۰۰ کورنۍ له افغانستانه د غلام خان په لاره پاکستان ته اوړيقبایلي مشر سلیم داوړ
سلیم داوړ وايي، چې تر دې وروسته به هره ورځ دوه، دوه سوه کورنۍ بېرته وزیرستان ته ستنیږي.نوموړي وویل، د دوی د اړیکو له مخې د ډیورند کرښې نږدې د زیرو پواینټ ( صفري سیمې) ته د میرانشاه د پولټیکل اېجنټ په ګډون یو شمیر ځايي چارواکي هم د ورستنیدونکو کډوالو د هرکلي لپاره ورغلي دي.
د خوست په ګلان کيمپ کې د وزیرستانیو کډوالو تر ټولو ستره شمېره استوګنه لري.په شمالي وزیرستان کې د ضرب عضب عملیاتو له وجې زرګونه کورنۍ افغانستان ته هم کډه شوې وې چې اوس یې د بیرته ستنولو لړۍ پیل شوېده.
