د لاسرسي ځای

د کندهار ولايتي چارواکي وايي، په دغه ولايت کې د سېشنبې د ورځې د حملو د تحقيقاتو پلټنه روانه ده او ډېر ژر به یې پایلې له ولایتي او مرکزي چارواکیو سره شريکې کړل شي.

دا خبره د کندهار د والي وياند صميم خپلواک د جمعې په ورځ له مشال راډيو سره په خبرو کې وکړه.

خپلواک: د پېښې څېړنه تر اوسه پای ته نه ده رسېدلې.
خپلواک: د پېښې څېړنه تر اوسه پای ته نه ده رسېدلې.

"د پېښې پلټنو لپاره په دا سبا له مرکزه او د هغه تر څنګ له متحده عرب اماراتو څخه د پلټونکې ډلې راغلې خو پلټنه يې تر اوسه پای ته نه ده رسېدلې او اوس هم جريان لري."

خپلواک دا هم وويل چې د دغه ولايت د والي همایون عزيزي روغتيايي وضعيت اوس د ډاډ وړ دی.

ښاغلی عزيزي د سې شنبې په ورځ د کندهار د ولايت په مېلمستون کې د بمي چاودنو پر مهال ټپي شوی وو.

د کندهار والي ډاکټر همایون عزیزي.
د کندهار والي ډاکټر همایون عزیزي.

نوموړي وويل چې د والي عزيزي لومړنۍ درملنه په کندهار ولایت کې وشوه، خو د نورې درملنې لپاره هند ته وړل شوی دی.

نوموړي زیاته کړه:

"هغه نن د هند هېواد يوه مرکزي مجهز روغتون ته وړل شوی دی چې هلته تر درملنې لاندي دی، د ډاکټرانو سره چې موږ په تماس کې يو د هغوی د نقل قول پر اساس، روغتيايي وضعيت يې د ښه کېدو په حال کې دی، له خطره بهر دی، هغه سوځېدلی دی چې وروسته به یې جراحي درملنه هم کېږي، نن سهار د خپلې کورنۍ له غړیو سره هم پر ټليفون ږغېدلی دی."

په همدې حال کې د چار شنبې په ورځ د هند وزیر اعظم نرېندرا مودي افغان ولسمشر محمد اشرف غني ته يو لیک لېږلی او په افغانستان کې یې د وروستیو بریدونو غندنه کړې ده:

مودي: هندوستان پر افغانستان دغه حملې غندي.
مودي: هندوستان پر افغانستان دغه حملې غندي.

"کله چې مې په کابل او کندهار کې د حملو په اړه واورېدل، زه ډېر غمجن شوم، هند پر افغانستان دغه حملې غندي، دا حملې د منلو وړ نه دي او د افغانستان د خلکو د هغه پرمختګ پر ضد دي چې دوی پر ټولو زحمتونو سربېره کړی دی."

مودي دا هم ویلي چې پر افغانستان حملې بايد د ټولې نړۍ له خوا وغندل شي او د دې حملو کوونکي او ملاتړي يې بايد محاکمه شي.

مودي په دغه لیک کې د حملو د قربانيانو کورنيو ته تسليت وړاندي کړی دی او ده زیاته کړې چې هند د افغان ولس او د متحده عرب اماراتو د خلکو ملاتړ کوي او هېواد به يې د تروريزم د مخنیوي په مبارزه کې له افغانستان سره يوځای ولاړ وي.

په افغانستان کې دغه حملې د افغانستان د ګاونډيو په ګډون د یو شمېر هېوادونو له خوا په پراخه توګه وغندل شوې.

د سېشنبې په ورځ د کندهار ولایت پر مېلمستون بمي حمله وشوه چې پکې د ملي شورا د دوو غړیو او عربي ډپيلوماټانو په ګډون ۱۱ تنه ووژل شول او د کندهار د والي او متحده عرب اماراتو د سفیر په ګډون ۱۲ تنه ټپيان شول.

د مشال ویډیوګانې، انځورونه

انځورونه، ویډیوګانې

تفصیل...
XS
SM
MD
LG