په وړاندیز کې راغلي چې په شام کې له القاعدې سره د تړلې یوې ډلې شاوخوا ۹۰۰ غړي دې له حلب ښاره و ایستل شي او په یوه نامشخص ځای کې دې ورته ((پناه)) ورکړل شي.
دا وړاندیز د پنجشنبې ورځ د شام لپاره د ملګرو ملتونو ځانګړي استازي سټېفن دي مېستورا کړی چې روسیه یې د امنیت شورا بیړنۍ غونډې وربللو غوښتنې ته اړ کړه.
دي مېستورا خبرداری ورکړ چې په ختیز حلب کې د فتح الشام ډلې تر ولکې لاندې برخې ښايي د روسیې او شام بمباریو په نتیجه کې ((په بشپړه توګه ویجاړې)) شي.
مېستورا وړاندیز وکړ چې د وینې تویونې مخنیوي لپاره تیار دی چې خپله د یادې وسله والې ډلې غړي د هغوی د خوښې پناه ځای ته یوسي. روسیه او شام په ښار کې د ترهګرې ګرځول شوې دې ډلې موجودګي د خپلې سختې بمبارۍ دلیل په توګه وړاندې کوي.
دي مېستورا وايي، د تېرو دوو اوونیو په بمباریو کې ۳۷۶ کسان وژل شوي دي. ده وویل، د هغو ((۹۰۰ کسانو په اړه غږېږي چې له کبله یې پر دوه لاکه ۷۵ زره خلکو حملې کېږي.)) د فتح الشام په نوم د دې ډلې پخوانی نوم نصره جبهه وو.
دي مېستورا دې ډلې ته مخاطب شو او ویې ویل چې ((که په عزت د ښار پرېښودو پرېکړه کوي نو شخصاً تیار دی چې ورسره ولاړ شي.))