د بنګله ديش بهرنيوو چارو مرستيال وزير شهريار عالم اې اېف پي خبري اژانس ته تاييد کړې چې دوی په دغه کنفرنس کې برخه نه اخلي.
د هند تر بايکاټ وروسته، هندي مطبوعاتو ليکلي چې افغانستان او بوټان هم دې سيمينار ته نه ځي.
د هند بهرنیو چارو وزارت د سېشنبې ورځ په یوه خبرپاڼه کې وویل، په سرحدي سیمو کې د ترهګرو بریدونو او د سیمه ییزې همکارۍ سازمان په غړیو هېوادونو کې د لاسوهنو له امله په اسلاماباد کې غونډې ته نه ورځي. وړاندې ټاکل شوې وه چې نریندرا مودي په اسلام اباد کې غونډې ته ورشي.
په خبرپاڼه کې د هېواد نوم اخیستو پرته خو نوي ډيلي پر پاکستان تور پورې کوي چې په خپله خاوره کې یې وسلهوال پاللي او په هندي کشمیر کې پر پوځي اډه په وسلهواله حمله کې چې ۱۸ تنه پکې ووژل شو، لاس لري.
هند او افغانستان پر پاکستان تور پورې کوي چې د ترهګرو ملاتړ کوي خو اسلام اباد دا تور ردوي.
د هند وزيراعظم نريندرا مودي په کشمير کې د هندي پوځيانو پر يو مرکز تر بريد وروسته ويلي ول چې دوی به په نړۍ کې پاکستان په سفارتي توګه يوازې کړي.
د پاکستان بهرنیو چارو وزارت ویلي چې اسلاماباد د سولې ټینګښت ته ژمن دی.
د هند، هندو ورځپاڼې د سارک هېوادونو اوسني مشرتابه، نيپال د يو چارواکي له خولې ليکلي دي چې که څلور هېوادونه کنفرنس ته نه ورځي نو کېدای شي سږ کال د سارک غونډه و نه شي.
افغانستان، هند، بنګلهدیش، بوټان، نیپال، مالدیف او سریلنکا د جنوبي اسیا سیمه ییزې همکارۍ سازمان سارک غړي دي.