د پاکستان پوځ مشر جنرال راحیل شریف تور پورې کړی چې ترهګرو ته له هېواد بهره مالي سرچینې او د هېواد دننه ورته اسانتیاوې برابرول کېږي.
د پاکستان پوځ عامه اړیکو دفتر (ای اېس پي ار) بېګا په یوه بیان کې وویل، جنرال شریف دا خبره تېر مازیګر د هېواد امنیت په اړه په یوه غونډه کې وکړه. بیان په دې اړه نور وضاحت نه دی ورکړی.
بیان وايي، په غونډه کې له امنیتي او استخباراتي چارواکو علاوه، وزیراعظم نواز شریف، د ملي امنیت سلا کار ناصر جنجوعه او د کورنیو چارو وزیر چودري نثار علي خان هم ګډون وکړ.
بیان وايي، په غونډه کې د هغو مخالفو استخباراتي ادارو او د هغوی د ملاتړیو پر رول خبرې وشوې چې په پاکستان کې بې ثباتي پیدا کول غواړي.
بیان وايي، په غونډه کې پر ډېورنډ کرښې د امنیت ټینګښت په اړه هم بحث وشو.
د ای اېس پي ار بیان زیاتوي چې وزیراعظم نواز شریف یو ځل بیا ډاډ ورکړ چې حکومت او ټول ولس د ترهګرۍ پر ضد په جګړه کې د پوځ او استخباراتي ادارو تر شا ولاړ دي.
