د پاکستان تحریک انصاف ګوند مشر عمران خان انکشاف کړی دی چې د لاهور په شوکت خانم روغتون کې د افغان طالبانو د یوه مشر درملنه شوې وه.
نوموړي بېګا د جیو ټيليوېژن په یوه خپرونه کې د دې طالب مشر نوم وانخیست خو ویې ویل چې د هغه علاج شاوخوا پینځه کاله مخکې شوی وو.
عمران خان وویل، دی هغه وخت خبر شو چې طالبانو ورته د مننې لیک واستاوه.
ده دا هم و نه ویل چې هغه طالب مشر په کوم رنځ اخته وو. نوموړي دا څرګندونې پر داسې وخت کړي دي چې د سې شنبې پر ورځ یې په پېښور کې هم د شوکت خانم سرطان روغتون څانګه پرانیسته.
افغان طالبانو د عمران خان څرګندونو په اړه لا څه نه دي ویلي.
د يادونې وړ ده چې شوکت خانم روغتون د عمران خان لخوا په لاهور کې جوړ شوی و او اوس يې بله څانګه په پېښور کې هم پرانيستل شول.