په پاکستان کې په روغتونونو او صحي مرکزونو کې ماشومانو ته د پولیو او نورو ناروغیو نه دبچ کېدو لپاره د واکسینو ځانګړې څانګې فعالې دي چې د صحت د محکمې نه علاوه د EPI په نوم یوه اداره ددې انتظام او څارنه کوي.
دا وېکسېن چې اکثر یې ډېر قیمتي وي د ملګرو ملتونو د صحت د څانګې په مرسته د حکومت له اړخه مفت ورکول کیږي. په دې پوښتنه چې کوم ماشومان د واکسینو نه پاتې شي دهغوي مالومات څنګه ترلاسه کوي، د اي پي آي مرستیال مشر ډاکټر تېمور خان وايي
« په هره ضلع کې زمونږ ټیمونه موجود دي، هغوی هره هفته مونږ ته راپورونه راکوي او که د پولیو کوم نوی کیس مخې ته راغلی وي، نو مونږ ترې په باقاعده توګه خبروي. »
بلخوا د چارسدې په یو هسپتال کې د واکسینو د مرکز چارواکې زمردشاه وايي دې مرکز کې یو شمېر نیمګړتیاوې دي، دا راز د خپل راپور مرکز ته استولو په لړ کې هم د مشکل سره مخ دي.
« موږ د راپور د استولو لپاره کمپیوټر ، جنریټر او نورو وسایلو ته ضرورت لرو.نو همداده چې د لوډشیډنګ له وجې زمونږ کار متاثره کیږي.»
په دې هکله ډاکټر تېمورخان وویل چې د هېواد د نورو مشکلاتو په څیر ددوي اداره هم یو شمېر مشکلات لري خو بیا هم دوي یې دهوارولو کوشش کوي.
« موږ په پاکستان غوندې په یو بې وځله هیواد کې ژوند کوو ، دلته بیلا بیلې ستونزې موجودې دي. خو شته وسایلو ته په کتو موږ هڅه کوو چې ستونزې هوارې کړو. »
ډاکټر تیمورخان زیاته کړه چې دوی په دې لړ کې د امریکايي مرستندویه ادارې USAID او د صحت نړیوالې ادارې WHO سره هم په رابطه کې دي او ممکنه ده چې په نږدې وخت کې به دغه ستونزې هوارې شي.
