برلېن - د جرمني وزیراعظمه انګېلا مېرکل او د فرانسې ولسمشر فرانسوا اولاند نن د روسیې ولسمشر ولادمیر پوټین ته د اوکراین سولې نوی پلان وړاندې کوي.
دواړو مشرانو د پلان په اړه د پنجشنبې یا زیارت پر ورځ ورځ له اوکرایني ولسمشر پېترو پوروشېنکو سره خبرې وکړې.
د پلان په اړه هېڅ مالومات نه دي په ډاګه کړل شوي خو پوروشېنکو وايي، نوی پلان په ختیز اوکراین کې ((د اوربند تمې پیدا کوي.))
په هغه سیمه کې د روسي پلویو بېلتونپالو او اوکراینیو ځواکونو تر منځ جګړه روانه ده چې پکې د تېر کال اپرېل میاشت راهیسې له ۵۳۵۰ څخه زیات کسان وژل شوي دي.
تر دې مخکې، تېره ورځ پېترو پوروشېنکو او د امریکا د بهرنیو چارو وزیر جان کیري په کییف کې خبرې وکړې.
کیري وویل، واشنګټن د ډېپلوماسۍ ملاتړ کوي، خو دا چې له پولې د روسي ټانکونو او سرتېرو اوکراین ته په اوښتو هم ((سترګې نه پټوي.))
کیري وویل، امریکايي ولسمشر باراک اوباما به ژر پرېکړه وکړي چې له بېلتونپالو سره د جګړې لپاره اوکراین ته وسلې ورکړي او که څنګه؟
مسکو وايي، که امریکا کییف ته وسلې واستولې نو دا به امنیت ته ګواښ وبولي.
