د پخواني سوات ریاست اخري ولې عهد ( د والي ځای ناستی ) میا ګل اورنګزیب د ورپېښې ناروغۍ له کبله د شپږ اتیا کالو په عمر کې د اتوار په ورځ په سوات کې وفات شو. د نوموړي د جنازې لمونځ په شاهي محل سیدوشریف کې وشو چې په سلګونو ولسي کسانو پکې برخه واخیستله خو حکومتي چارواکي پکې نه ترسترګو کیدل.
سوات په ۱۹۶۹ کال کې دپاکستان سره شامل شو او ځانګړی حیثیت یې ختم شو، هماغه وه چې میاګل اورنګزیب هم دوه وارې ګورنر وټاکل شو ، یو وارې د هغه مهال د صوبه سرحد او یو وارې د بلوچستان.
میا ګل اورنګزیب همدارنګه څو وارې د پاکستان د قومي اسمبلۍ منتخب غړی هم پاتې شوی دی.
نوموړی په کال ۱۹۲۸ کې په سیدو شریف کې زیږیدلی و ، او د هغه مهال د سوات د ریاست د والي میا ګل عبدالحق مشر زوی و.
دسوات یو قومي مشر او د میا ګل اورنګزیب نږدې دوست حاجي رسول خان د نوموړي د شخصیت په اړه وايي :
(( دده د ډیرو زیاتو خلکو سره پیژندګلوي وه ، دنیا کې یې له هرچا سره تعلقات ساتل، داسې کس به نه و چې ده به ورسره نه پيژندل. په ملک دننه او د ملک نه بهر به یې د خلکو ستونزې ترخپله وسه پورې هوارولې. ))
د سوات یو لیکوال فضل ربي راهي بیا د نوموړي د شخصیت او کار په اړه وايي :
(( د نوموړي ډیر لوی حیثیت او اسر و رسوخ و ، همداوه چې خلکو ترې ډیره تمه هم کیده، خو د خلکو د غوښتنو مطابق نوموړي د سوات لپاره هغه کارونه نه دي کړي. خو ددې باوجود هغه یو په زړه پورې شخصیت و او خلکو هغه ډیر زیات خوښولو. د هغه یادونه به د سوات د خلکو په ذهنونو کې تر ډیره وخته پورې ژوندي وي.))
دسوات یو شمیر نورو خلکو هم مشال راډیو ته وویل چې دوی د میاګل اورنګزیب په مړینه سخت خپه دي. میا ګل اورنګزیب د سوات د شاهي خاندان اخرنی نفوس لرونکی کس ګڼل کیده چې له نړۍ یې سترګې پټې کړلې.
