بنو: په شمالي وزیرستان کې د بې پایلټه الوتکې په تازه برید کې لږترلږه شپږ وسله وال وژل شوي دي. دا برید د ډیورڼد کرښې ته نژدې د دته خېل تحصیل په ډوګه مداخېل سیمه کې شوی دی.
سیه ییز چارواکو د برید پخلی کړی دی او وايي چې بې پایلټه الوتکې د شنبې په سهار وختي هلته د وسله والو یو مرکز په دوو توغندیو وویشتئ.
ځیني چارواکي وايي چې د بې پایلټه الوتکې د دې برید په نتیجه کې په وژل شوو وسله والو کې ځیني پنجابیان هم شامل دي.
دا له هغه راهسې د بې پایلټه الوتکو څلورم برید دی چې پاکستاني پوځ د جون میاشتې پر ۱۵مه نېټه په شمالي وزیرستان کې د وسله والو پر ضد عملیات پیل کړل.
بل پلو د افغانستان په کونړ ولایت کې هم د بې پایلټه الوتکې په برید کې څلور وسله وال وژل شوي دي.
د کونړ امنیه قومندان عبدالحبیب سید خیل نن (شنبه) مشال راډيو ته وویل چې بې پایلټه الوتکې بېګا شپه د غازي اباد ولسوالۍ په درین دره کې برید کړی چې په نتیجه کې یې د څلورو وسله والو د وژل کېدو تر څنګ دوه تنه نور ټپیان شوي هم دي.
عبدالحبیب سید خیل وايي چې په وژل شوو وسله والو کې یو پاکستانی هم شامل دی.