لیرې شویو افغان کاندیدانو سپیناوی وغوښت
د ولسمشرۍ کاندیدانو له لیسته شپاړلس لیرې شویو کاندیدانو د انتخاباتو خپلواک کمیسیون ته اته څلویښت ساعته وخت ورکړ چې د دوی د لري کیدو په اړه وضاحت ورکړي. دې کسانو د پنج شنبې په ورځ په کابل کې یوې خبري غونډې ته د وینا پر مهال د انتخاباتو د خپلواک کمیسیون پریکړه غیر عادلانه و بلله. د انتخاباتو خپلواک کمیسیون د میزان په دیرشمه د جمهوري ریاست د انتخاباتو د کاندیدانو ابتدایې لست خپور کړ چې پکې د شپاړسو کاندیدانو نومونه نه وو شامل. اخوا د انتخاباتو خپلواک کمیسیون وایې دوی به تر راتلونکو څو ورځو پوري دې کاندیدانو ته د هغوی د لري کیدو په اړه وضاحت ورکړي.