د لاسرسي ځای

تازه خبر

ملاله له هیلو ډک څرک


حسن مجتبی ليکي چې دا مهال به دې جنګځپلي ماحول کې له امنه ډک د ملالې آواز د اميد د یوې ډیوې د یو څرک غوندې دی.

له پاکستانه خپرېدونکې جنګ ورځپاڼه کې ليکوال حسن مجتبی ليکې چاته مالومه وه چې یوه ورځ به په سوات کې سکول ته تلونکې یوه وړوکې جینۍ په ټوله نړۍ کې د خپلې مېړانې او له تعليم سره د مينې له وجې مشهوره شي.


ليکوال ليکي چې زه هم څو ورځې مخکې د خلکو په هغه قطار کې ولاړ وم ، چې غوښتل یې د خيبر پښتونخوا د سوات سيمې له ملالې يوسفزۍ سره روغبړ وکړي ، هر کس غوښتل چې د دغې بهادرې جینۍ سره د روغبړ اعزاز تر لاسه کړي.

ليکوال حسن مجتبی ليکي چې ما ته ملاله يوسفزۍ د هغې د همعمرې یهودې جينۍ اين فرېنک غوندی ښکاره شوه، چې د هټلر لخوا په یهودیانو او بیا د هغې په کورنۍ د ظلم کیسه یې په يوه ډايرۍ کې ليکلي وه ، او بیا هغه ډايرۍ کتابي بڼه واخیسته.

د این فرينک دغه ډايري د نړی په ګڼشمېر ژبو کې ژباړل شوې تر ټولو مشهوره لیکنه ده.

حسن مجتبی مخکې ليکې چې اين فرېنک په خپله ډايرۍ کې د فاشستانو او جرمن نازیانو د ظلم تذکره کړې ده ، خو ملالې د ګل مکۍ په نوم خپله ډايري کې د هممذهبو طالبانو د ظلمونو ذکر کړی وو ، ملالې خپله ډايري هغه وخت ليکله کله چې وسله والو طالبانو په سوات د جینکو په تعليم بنديز لګولی وو.

ليکوال حسن مجتبی ليکي چې زما په نظر کله چې طالبانو دغه وړه ملاله يوسفزۍ په تندي وویشتله، نو هم په هغه ورځ دا د طالبانو لپاره د خودکشۍ ورځ وه ، هغه اوس هم ژوندۍ او جوړه ده ، خو طالبانو په خپل وجود ځانمرګی بريد کړی دی.

د ملالې په تندي ګولۍ څه ولګيده ، سم د ریښتياؤ لمر راوخت، او اوس دغه لمر د نړۍ له ټولو جغرافیایي سرحدونو ورتير شوی دی. دا مهال چې ملاله د نړۍ د هر کس د زړه اواز جوړ شوی دی دا د ریښتوني فکر کمال دی، دا د ريښتوني خيال جادو دي.

حسن مجتبی وايي چې د روانې میاشتې په ۱۲مه نېټه د ملګرو ملتونو په جنرل اسمبلۍ کې د وینا پر مهال ملالې وويل، چې طالبان اسلام او پښتانه دواړه بدناموي ، نو هغې ريښتيا ويل هغه ځکه ، چې پښتانه خو د عدم تشدد د علمبردار باچا خان پلویان دي ، او د ليکوال په خبره پښتنو ته له باچا خان وروسته په ملاله فخر په کار دی.

حسن مجتبی ليکي چې دا مهال به دې جنګځپلي ماحول کې له امنه ډک د ملالې آواز د اميد د یوې ډیوې د یو څرک غوندې دی.

ليکوال د خپلی مقالې په پای کې ليکي چې ملاله خو د غني خان، رحمان بابا، خوشال خان خټک او د اجمل خټک د شاعرۍ غوندې ده، چېري به هم نه مري، ځکه چې د ژوند نه منکرو خلکو ماتې وخوړه، او ټوپکمار له ماشومانو وېرېږي.
XS
SM
MD
LG