په افغانستان کې مېشت نړیوال سوله ساتي ځواکونه وايي، په کونړ او غزني کې یې دوه طالب مشران وژلي دي.
نن د ایساف لخوا په خپور شوي بیان کې ویل شوي، افغان او بهرنیو سرتېرو په ګډو عملیاتو کې د کونړ په دانګام ولسوالۍ کې یو طالب قوماندان وژلی دی چې له القاعده سره تړاو لري.
دا طالب مشر ولي نومېږي. د ده په اړه ویل شوي چې د طالبانو او القاعده په منځ کې یې د فعالیتونو له پاره همکاري کوله، په دانګام ولسوالۍ کې یې پر افغان او بهرنیو سرتېرو حملې ترتیبولې او د وسلو او ځانوژونکو حملو واسکټونو انتقال یې څاره. بیان وايي، بل طالب مشر چې علا الدین نومېږي د غزني په اندړو کې وژل شوی دی.
علا الدین د یاغیانو د هغې ډلې مشر وو چې پر افغان او بهرنیو سرتېرو یې د حملو له پاره ماینونه ښخول او د وړو وسلو حملې یې کولې. تر وژنې مخکې نوموړي په غزني کې پر افغان ملي پولیسو د حملې پلان جوړاوه.