د پاکستان د جنوبي وزيرستان په واڼه کې د احمدزو وزيرو جرګې په خپله سيمه کې میشتو محسودو کډوالو ته ویلي چې تر پنځم دسمبره پورې دې ددوی له سیمې خپلې کډې بار کړي.
د خالي په ورځ جرګې دا پريکړه په ځايي طالب قومندان ملا نذير باندې تر بريد وروسته وکړه.
د مشال راډيو د خبريال دخبرله مخې په واڼه کې جرګې په خپله پرېکړه کې ویلي چې د ټاکل شوې نېټې وروسته که چیرې د وزير قبیلې يو تن د محسود قبیلې کډوالو يا طالبانو ته پنا ورکړه نو لس لکه روپۍ به جرمانه کولی شي او کور به يې هم سوزولې شي .
جرګې حکومت ته ویلي دي چې تر پنځم دسمبر وړاندې، د وزير علاقي په سرکاري زمکه يا ودانیو کې آباد محسود کډوال له سيمې وباسي.
وزيرقبایل شک لري چې په مولوي نذير بريد کې د محسود قبيلې ځینې کسان ککړ دي.مولوي نذيز د طالبانو د حکومت پلوی ډلې قومندان دی.
