پراګ - د پاکستان د ولسمشر اصف علي زرداري په مشرۍ کې د امریکا د ټولو ځواکونو پخواني مشر ایډمرل مایک ملن ته د خط لیکلو په اړه د پیدا شوې ناندرۍ د جاج اخیستو لپاره په اسلام اباد کې د پیپلز ګوند د مهمو غړو غونډه شوې ده.
په امریکا کې مېشت یوه کاروباري کس منصور اعجاز په خپل یوه مضمون کې ادعا کړې ده چې د اسامه بن لادن تر وژنې وروسته په امریکا کې د پاکستان سفیر حسین حقاني په مرسته، اصف زرداري، مایک ملن ته یو پټ لیک استولی وو.
د ده د ادعا تر مخې په لیک کې دا غوښتنه شوې وه چې امریکا دې د پاکستاني پوځ له لورې په ممکنه توګه، د اصف زرداري له څوکۍ د لرې کولو مخه ونیسي.
په امریکا کې د پاکستان سفیر حسین حقاني د یوې غونډې پر مهال خبریالانو ته ویلي، دا د ده پر ضد یوه پروپاګینډه ده:
((د پاکستان د حکومت لخوا د دې خبرې پر پلټنې کولو زما هیڅ اعتراض نشته. زه د ولسمشر په امر پاکستان ته ځم. او دا د ولسمشر حق دی چې پرېکړه وکړي چې زه نور د سفارت د فرض پوره کولو ته دوام ورکړم او که نه.))
ټاکل شوې چې د شنبې په شپه به حسین حقاني پاکستان ته ورسي.
د مې په دویمه نېټه په اېبټ اباد کې د امریکا د ځانګړو ځواکونو په عملیاتو کې اسامه بن لادن ووژل شو. تر دې وروسته په پاکستان کې داسې ګنګوسې وې چې ښايي پوځ، ولسمشر اصف زرداري له واکه لرې کړي.
