د کرکټ په ۲۰ اووریز نړیوال جام کې د اکتوبر پر ۳۰مه نېټه دوه لوبې ترسره شوې چې یوه پاکستان او بله جنوبي افریقا وګټله.
لومړۍ لوبه د پاکستان او نېدرلینډز لوبډلو ترمینځ په پرت مېدان کې وشوه چې پاکستان په شپږو وېکټو وګټله.
نېدرلېنډز لوبډلې پچه وګټله او لومړی یې خپله د بیټېنګ کولو پرېکړه وکړه. هغې لوبډلې په ټاکلیو ۲۰ اوورونو کې یوازې ۹۱ منډې وکړای شوی او نهه لوبغاړي یې وسوځېدل.
د نېدرلینډز له خوا تر ټولو ښه لوبه کولن اکرمین وکړه او ۲۷ منډې یې جوړې کړې. د پاکستان له خوا شاداب خان درې او محمد وسیم دوه وېکټې واخیستې.
په ځواب کې د پاکستان لوبډلې چټک پیل وکړ خو وروسته یې نیدرلینډز د چټکو منډو جوړولو مخه ونیوله. دوی هدف په ۱۴م اوور کې د څلور لوبغاړو په سوځېدو پوره کړ.
تر ټولو ښه لوبه محمد رضوان وکړه او ۴۹ منډې یې جوړې کړې. د نېدرلینډز له خوا برېنډن ګلور دوه لوبغاړي وسوځل.
په پرت کې په دویمه سیالۍ کې د هند لوبډلې پکې پچه وګټله او لومړی یې په خپله بیټېنګ وکړ.
هند په ټاکلیو ۲۰ اوورونو کې د نهو لوبغاړو په سر ۱۳۳ منډې وکړې او جنوبي افریقا ته یې د دې مهمې لوبې ګټلو لپاره د ۱۳۴ منډو هدف ورکړ.
د هند له اړخه تر ټولو ښه لوبه سوریا کمار یادو وکړه. هغه په ۴۰ بالونو ۶۸ مندې وکړې. د جنوبي افریقا له خوا لونګي اینګېډي څلور او وېن پارنل درې وېکټې واخیستې.
جنوبي افریقايي لوبډلې په وروستي اوور کې د پینځو لوبغاړو په زیان هدف پوره کړ او هند ته یې په پینځو وېکټو ماتې ورکړه.
ټاکل شوې چې د اکتوبر پر ۳۱مه د کوربه اسټرالیا او ایرلینډ لوبډلې یو بل ته مخامخې شي. تر هغې وروسته د نومبر پر لومړۍ نېټه د افغانستان او سري لنکا او د انګلستان (انګلینډ) او نیو زیلینډ ترمینځ سیالۍ کېږي.
په اسټرالیا کې د ۲۰ اووریزه کرکټ نړیوال جام سیالۍ د اکتوبر له ۱۶مې راهیسې روانې دي او ټاکل شوې چې پایلوبه یې د نومبر پر ۱۳مه وشي.
