د کورونا وایرس وبا له کبله سږ کال په سېپټېمبر کې په نیویارک کې د ملګرو ملتونو عمومي جرګې کلنۍ غونډه په ویډیويي بڼه تر سره کېږي.
عمومي جرګه ۱۹۳ غړي هېوادونه لري چې د جولای پر ۲۲مه یې پرېکړه وکړه چې د نړۍ مشران به دا ځل په ۷۵مه کلنۍ سرمشریزه کې د ویډیو له لارې ګډون کوي.
د سفري محدودیتونو او د غونډو پر مهال د کورونا وایرس خپرېدو ګواښ له کبله، د جرګې مشر تیجاني محمد ته غړیو هېوادونو لیک استولی وو چې پکې یې ورڅخه د ویډیويي غونډې غوښتنه کړې چې په ودانۍ کې د ګڼې ګوڼې مخه ونیول شي.
دا په داسې حال کې ده چې په نړۍ کې د کورونا وایرس مثبتو پېښو شمېر ۱۵.۱ میلیون ته رسېدلی او شاو خوا تر شپږ لاکه ۲۲زره زیات کسان ترې مړه شوي دي.
د امریکا جانز هاپکنز پوهنتون شمېرې ښايي چې په نړۍ کې له کورونا وایرسه تر ۸،۶ میلیونه زیات کسان جوړ شوي هم دي.
