د باجوړ د سالارزیو پر هغه لښکر ډزې شوې دي چې په بالم خار سیمه کې د یوه کس د یو تن د وژنې په تورد پېنځو کسانو کورونو سوځولو ته ورغلي ول.
چارواکي او د سیمې اوسېدونکي وايي، په ډزو کې د لښکر دوه ګډونوال وژل شوي دي.
څه پېښ شول؟
د سالارزیو د پولیسو یو افسر ګلزر خان د اګست پر پېنځمه مشال راډيو ته وویل، تر دې پېښې یوه ورځ مخکې ځینو وسله والو د سیمې یو ځوان محمد رییس وتښتاوه چې وروسته یې په یوه شاړه کې مړی وموندل شو.
د ده په خبره، پولیسو لومړی هغه ګاډی وموند چې پکې رییس تښتول شوی وو او وروسته یې د ګاډي مالک نعمت الله ونیو چې ورباندې د نوموړي د وژنې تور پورې شوی.
د سالارزیو ولس تر دې پېښې وروسته جرګه وکړه او پرېکړه یې وکړه چې په پېښه کې د ککړتیا په تور د پېنځو کسانو کورونه سوځوي.
د کورونو سوځل
د سیمې پولیس او اوسېدونکي وايي، د سالارزیو یو لښکر د اګست پر پېنځمه د نعمت الله د پلار حبیب باچا په ګډون څلور کورونه وسوځول او د پېنځم کور پر لوري چې روان شول نو له هغه ځایه ورباندې ډزې وشوې چې پکې امان الله او دلبر ولګېدل.
د ضلعې د روغتیا ادارې مشر ډاکتر وزیر ساپی وايي، روغتون ته د دواړو کسانو مړي وروړل شوي ول.
لښکر پر ډزو سربېره پېنځم کور هم وسوځاوه.
د سیمې اوسېدونکي وايي، د جرګې تر پرېکړې وروسته د ټولو کورونو اوسېدونکي بل ځای ته تللي ول.
د لښکر ضد مقدمه
د پولیسو افسر ګلزر خان وايي، د باجوړ د پولیسو مشر د امنیتي حالت سمولو په موخه سیمې ته ګڼ سرتېري استولي دي.
دی زیاتوي چې د لښکر ضد مقدمه دایروي ځکه چې هغوی د قانون سرغړونه کړې او د کورونو سوځلو پر مهال د لښکر ګډونوالو پر پولیس سرتېرو ګوزارونه هم کړي دي.
د پاکستان حکومت د ۲۰۱۸ز کال په مې کې تر اییني بدلون وروسته قبایلو ته د پولیسو او عدالتونو نظام وروغځاوه خو پر دې سربېره هلته اکثر د ځايي مشرانو جرګې پرېکړې کوي.
د فېسبوک تبصرې