افغانستان ته د تګ راتګ لپاره د پاسپورټ او ویزې لازمي کېدو پرضد په چمن کې د روان پرلت د نومبر پر ۱۲مه ۲۳مه ورځ پوره شوه.
د چمن پر پوله د روزګار کوونکو پنډیانو یا د ځايي خلکو په وینا، لغړیانو د سازمان مشر او د روان پرلت مخکښ غوث الله د نومبر پر ۱۱مه مشال راډیو ته وویل چې دوی به تر هغه وخته ناست وي چې پاکستان خپله پرېکړه بیرته نه وي اخیستې.
د ده په وینا، دوی اوسمهال په چمن کې پرامن پرلت ته دوام ورکړی دی او که یې غوښتنې ونه منل شوې نو د سیاسي ګوندونو او ولس په ملاتړ به احتجاج نورو سیمو ته پراخوي او د کوټې او چمن لویه لاره به په بشپږ توګه بندوي.
د پاکستان حکومت د ۲۰۲۳م کال د نومبر له لومړۍ نېټې د چمن پر پوله هم افغانستان ته د تګ راتګ لپاره د پاسپورټ او ویزې درلودل لازمي کړي دي.
خو د پرلت مشر غوث الله وايي، "د پاکستان دا پرېکړه د چمن او شاوخوا سیمو په زرګونه خلک بې روزګاره کوي او د لاکونو خلکو له خولې ډوډۍ باسي."
له نوموړي مو وپوښتل چې پاکستان او افغانستان دوه بېل ملکونه دي نو دوی بیا ولې تر منځ د پاسپورټ او ویزې شرط نه مني؟
هغه وویل چې د چمن پوله او یا ټول ډیورنډ لاین د نړۍ له نورو پولو سره فرق لري. د ده په وینا، یو ورور په چمن او بل په بولدک کې اوسېږي نو دوی به څنګه هره ورځ یو بل ته په پاسپورټ او ویزه ورځي؟
د تاجرانو اتحاديې او سياسي ګوندونو دا پرلت د اکتوبر پر ۲۱مه پيل کړی او غوښتنه کوي چې چارواکي دې د چمن او سپين بولدک ترمينځ پر دروازه خلکو ته د پخوا په شان پر پاکستاني شناختي کارډ او افغان تذکرې د تګ راتګ اجازه ورکړي.
دوی وايي، له افغانستان سره پر پوله د تجارت او تګ راتګ لپاره د پاکستان د حکومت د پاسپورټ او ویزې لازمي کېدو شرط نه مني، ځکه چې په خبره يې له دې کار سره د سيمې زرګونه کسان بېروزګاره کېدای شي.
دوی وايي، له افغانستان سره پر پوله د تجارت او تګ راتګ لپاره د پاکستان د حکومت د پاسپورټ او ویزې لازمي کېدو شرط نه مني، ځکه چې په خبره يې له دې کار سره د سيمې زرګونه کسان بېروزګاره کېدای شي.
په پرلت کې د لویو سوداګرو ترڅنګ هغه مزدوران هم شامل دي چې پخوا به یې هره ورځ د چمن او سپین بولدک ترمينځ سامانونه لېږدول.
په هغو کې شامل زیاتره مزدوران پنډیان یا ګنډې وړونکي دي چې ځايي خلک یې لغړیان بولي. پرلتوال وايي، د ټولو سیاسي ګوندونو له ملاتړه برخمن دي او زیاتوي چې د غوښتنې تر منل کېدو پورې خپل احتجاج ته دوام ورکوي.
د چمن ډېپټي کمېشنر یا انتظامي مشر راجا اطهر عباس د نومبر پر لومړۍ نېټه خبریالاتو ته وويل چې پر پوله یې ټولې وړې لارې تړلې دي او اوس به خلک یوازې پر پاسپورټ او ویزې تګ راتګ کولای شي.
تر دې وړاندې، د بلوچستان د اطلاعاتو نګران وزیر جان محمد اڅکزي د اکتوبر پر ۲۴مه مشال راډيو ته ويلي ول چې د امنيت د ټينګښت او د قاچاق د مخنيوي لپاره يې د پاسپورټ او ويزې شرط ایښی دی.
له پرلتوالو سره د چمن د ضلعي انتظاميې او د بلوچستان د نګران حکومت تر څنګ د پاکستان د پوځ د جنوبي زون (سدرن کور کماڼد) مشر جنرال اصف غفور خبرې کړې دي خو نتيجې ته نه دي سره رسېدلي.
دا تر هغه وروسته ده چې د اکتوبر پر درېيمه د پاکستان حکومت د افغان کډوالو په ګډون ټولو بې اسناده بهرنيو وګړو ته د اکتوبر تر ۳۱مې وخت ورکړ چې له هغه هېواده وځي.
حکومت ويلي ول چې تر هغه وروسته به له افغانستان سره تګ راتګ يوازې پر پاسپورټ او ويزه کوي.
د پاکستان او افغانستان ترمینځ پر ډېورنډ کرښه پخوا د تګ راتګ لپاره ډېرې لارې وې خو پر کرښه د اغزن تار تر غځېدو وروسته د دواړو هېوادونو وګړي یوازې پر محدودو لويو لارو تګ راتګ کولای شي.
