د امریکا د بهرنیو چارو وزیر مارکو روبیو به د لوړپوړي پلاوي په مشرۍ روانه اونۍ جرمني ته سفر کوي.
د امریکا د بهرنیو چارو وزارت د فبرورۍ پر نهمه ناوخته په یو بیان کې ویلي چې نوموړی به هلته په میونخ امنیتي کانفرنس کې ګډون کوي.
وزارت زیاتوي چې نوموړی به له دې وروسته هنګري او سلواکیا ته هم ورځي.
دا سفر په داسې وخت کې کېږي چې د واشنګټن او اروپايي اتحادیانو ترمنځ یې د امنیت، تجارت او د ټرانس اټلانټک اتحاد د راتلونکي په اړه بې باوري زیاته شوې ده.
وویل کېږي چې دا اختلافات به د میونخ په غونډه کې څرګند وي.
تمه ده چې په میونخ غونډه کې د اوکراین او روسیې جګړه او د ایران حالات په اړه د خبرو اترو لویه موضوع وي.
دا په داسې حال کې ده چې په اوکراین د روسیې د بشپړ یرغل پنځه کاله پوره کېدونکي دي.
ټاکل شوې ده چې د میونخ امنیتي کانفرنس د فبرورۍ له ۱۳مې واخلې د فبرورۍ تر ۱۵مې وي.