د امریکا ولسمشر ډونلډ ټرمپ د یو لاریون پر مهال د تیرو ولسمشریزو انتخاباتو په اړه تازه ناسمې ادعاوې کړې دي.
ولسمشر ټرمپ د ډسمبر پر پنځمه په جارجیا ریاست کې د ریپبلیکن ګوند د سېنیټرانو لپاره جوړې شوې جلسې ته وینا کوله.
په دې ریاست کې د سېنیټ لپاره پر ځینو چوکیو د دویم پړاو انتخابات کېدونکي دي چې ورسره به په ډاګه شي چې په سېنیټ کې کوم ګوند اکثریت ترلاسه کوي.
ولسمشر ټرمپ لا هم د نومبر پر دېریمه په شویو ولسمشریزو انتخاباتو کې د ډیموکراټ ګوند د امیدوار جوبایډن په وړاندې ماتې نه ده منلې.
ولسمشر ټرمپ په جارجیا کې د زرګونو خلکو غونډې ته یو ځل بیا تکرار کړه چې په انتخاباتو کې درغلۍ شوې دي او د ده په وینا د دې انتخاباتو پر سر معامله شوې ده.
نوموړي په داسې حال کې د انتخاباتي درغلیو د تورونو سلسله جاري ساتلې ده چې عدالتونو او د انتخاباتي کمېشن چارواکو یې په هغو ریاستونو کې هم دا تورونه رد کړي چې د ده او جوبایډن ترمنځ سخته مقابله وه.
د ولسمشر ټرمپ دې تازه ناسمو ادعاوو د سینیټ لپاره د ریپبلکین ګوند د امیدوارانو ډیویډ پرډو او کیلي لوفلر انتخاباتي لاریون هم اغیزمن کړی دی.
د دویم پړاو په انتخاباتو کې د دې دواړو بریا په سینټ کې د ریپبلکین ګوند اکثریت پر ځای ساتلای شي. په جارجیا کې د دویم پړاو دغه انتخابات د ۲۰۲۱م کال د جنورۍ پر پنځمه کېدونکي دي.