په پاکستان کې له بېوزله خلکو سره د مالي پروژې مشرې ویلي چې له بېنظیر انکم سپورټ پروګرامه شاوخوا ۲،۵۰۰ سرکاري افسرانو پیسې اخیستې.
ډاکترې ثانیې نښتر پرون ناوخته پر ټوېټر په بیان کې ویلي چې د ۱۷م او تر دې د لوړې سطحې افسرانو پر ضد اقدام کوي. نوموړې ویلي چې په پروژه کې د درغلۍ تر ټولو زیاتې پېښې په سیند صوبه کې شوې دي چې پکې د پیپلز ګوند واکمني ده.
د دې ګوند یو سېنېټر بهره مند تنګي نن مشال راډیو ته وویل، صوبايي حکومت د شاوخوا ۱،۱۰۰ لوړپوړو افسرانو پر ضد کارروايي کوي. ډاکتره نښتر زیاتوي چې په بلوچستان کې ۷۴۱ او په خیبر پښتونخوا کې ۴۰۳ افسرانو د بینظیر انکم سپورټ پروګرام پیسې بېوزله کسانو ته نه ورکولې.
تورنو سرکاري افسرانو لا په دې اړه څه نه دي ویلي.