پراګ - هند او امریکا له پاکستانه غوښتي چې پر خپله خاوره د فعالو ترهګرو ډلو ضد اقدامات وکړي.
دواړو هېوادونو دا غوښتنه تر هغې ساعتونه وروسته کړې چې د فبرورۍ پر ۱۴مه، د هند تر واک لاندې کشمیر کې په موټر بم ځانمرګي برید کې ۴۴ هندي سرتېري ووژل شول.
پاکستان مېشتې وسله والې ډلې جیش محمد د جمو او کشمیر پر لویه لار له سرینګر سره نېږدې د دې برید ذمه واري منلې.
هندیو چارواکو ویلي، دا حمله هغه مهال شوې چې د ملېشې سرتېرو قافله پر لویه لار روانه وه.
د دوی په خبره، ځانمرګي بریدګر له چوونکو موادو ډک ګاډی د سرتېرو له قافلې سره وجنګاوه.
دا په تېرو دوو لسیزو کې په سیمه کې له خونړیو بریدونو څخه یو بلل کېږي.
تر حملې وروسته د هند د بهرنیو چارو وزارت په یوه بیان کې پر اسلام اباد غږ وکړ چې پر خپله خاوره د "هغو ترهګرو او وسله والو ډلو ملاتړ" ودروي چې په نورو هېوادونو کې بریدونه کوي.
هندي وزیراعظم نرېندرا مودي پر ټوېټر په بیان کې د برید غندنه کړې او لیکلي یې دي چې د سرتېرو دا قرباني به ضایع کېدو ته نه پرېږدي.
Attack on CRPF personnel in Pulwama is despicable. I strongly condemn this dastardly attack. The sacrifices of our brave security personnel shall not go in vain. The entire nation stands shoulder to shoulder with the families of the brave martyrs. May the injured recover quickly.
— Narendra Modi (@narendramodi) February 14, 2019
په عین وخت کې سپینې ماڼۍ هم په یوه بیان کې له پاکستانه غوښتنه کړې چې "سمدستي دې پر خپله خاوره د فعالو ترهګرو ډلو له ملاتړه لاس واخلي."
بیان زیاتوي چې په کشمیر کې برید له هند سره د ترهګرۍ ضد همکارۍ پراخولو لپاره د امریکا هوډ پیاوړی کوي.
هند له اوږدې مودې راهیسې پر پاکستان تور پورې کوي چې په کشمیر کې د وسله والو ډلو ملاتړ کوي خو اسلام اباد په بیا بیا دا تور رد کړی او وايي، د خپلواکۍ د حق لپاره د کشمیریانو ډېپلوماټیک ملاتړ کوي.
د پاکستان د بهرنیو چارو وزارت د هند تر واک لاندې کشمیر کې پر ځانمرګي برید "سخته اندېښنه" ښودلې.
د فبرورۍ پر ۱۴مه، د وزارت په بیان کې راغلي، اسلام اباد د هندي حکومت او رسنیو له لوري "بې له تحقیقاتو له پاکستان سره د هغې حملې د تړاو تور ردوي."
په کشمیر کې تازه برید ښايي د نوي دلي او اسلام اباد تر منځ ستونزې ژورې کړي.
په اسلام اباد کې خبریال او شنونکی طاهر خان وايي، د حملې ذمه واري جیش محمد ډلې منلې چې تر هغې وروسته ښايي پر پاکستان فشار زیات شي.
د ده په خبره، د کشمیر موضوع د اسلام اباد او هند دواړو لپاره ډېره مهمه ده.
پاکستان او هند پر کشمیر د دعوې له کبله جنګونه هم کړي.