پاکستان په هېواد کې د پېټرولو د کمبوت د مخنيوي لپاره نوې تګلاره اعلان کړې ده.
پرون (د جون پر ۲۸مه) د دې هېواد د تېلو او پېټرولو مملکت وزیر مصدق ملک په لاهور کې خبرې غونډې ته وويل چې د دې تګلارې له مخې به په هېواد کې د پېټرولو د درامدوونکيو څو کمپنيانو اجاره داري ختمه شي.
هغه وویل چې اوس د نړۍ نورې کمپنانې کولی شي چې پاکستان ته پېټرول ور وړي او هلته يې زېرمه کړي:
"چې کله هم بیې (تېلو) زیاتې شي نو زېرمه کوونکي بازار ته د پېټرولو راوړل ودروي، خو اوس به دوی دا کار څنګه کوي؟ اوس خو به لکونه ټنه تېل د پاکستان په خپلو زېرمتونونو (ډېپوګانو) کې پراته وي او د وړو وړو پېټرول پمپونو مالکان به ورځي، پېټرول به ورڅخه اخلي او خپل پمپونه به چلوي. په نېږدې راتلونکې کې به موږ په پاکستان کې د پېټرولو کمبوت نه وي او تاسو ته به خلک په قطار کې په نظر را نه شي"
مصدق ملک زیاته کړه چې د بانډډ سټورېج په نوم دغه پالیسي به د بهرنيو اسعارو په بڼه کې د پاکستان اقتصاد ته ګټه هم ورسوي.
