د لاسرسي ځای

تازه خبر

یونېسف: لا هم افغانستان د ماشومانو لپاره ناوړه ځای دی


ارشیف، یو شمېر افغان ماشومان

د ماشومانو د ملاتړ لپاره د ملګرو ملتونو صندوق یونېسف افغانستان د ټولنیز او اقتصادي وضعیت له اړخه د ماشومانو لپاره ناوړه ځای بولي.

د افغانستان لپاره د یونېسف ادارې د ارتباطاتو، وکالت او مدني مشارکت مشرې سم مورت مشال رېډیو ته وویل، لوږې، بې‌وزلۍ او اقتصادي ځوړ (رکود) تر ډېره ماشومان اغېزمن کړي دي.

مېرمن مورت زیاتوي: "افغانستان د ماشومانو لپاره ناوړه ځای دی. د وزګارتیا زیاتېدو او اقتصادي ځوړ یا رکود ګڼې کورنۍ له بې‌وزلۍ سره لاس او ګرېوان کړي. میندې او پلرونه له سختو انتخابونو سره مخامخ شوي. د درې وختونو خوړو شمېر په کمېدو دی، د خوړو اندازه په کمېدو ده او دغه خواړه د دوی د تغذیې اړتیاوې نه‌شي پوره کولای. د حیرانۍ وړ نه‌ده چې ماشومان زیات کړېږي."

یونېسف په خپل یوه تازه راپور کې ویلي چې پر افغانستان د طالبانو تر واکمنېدو وروسته په سلو کې ۸۲ افغانانو خپل عاید له لاسه ورکړی او خلک مجبوره شوي چې په ماشومانو کار وکړي.

یونېسف خبرداری ورکړی چې د کارګرو ماشومانو شمېر د بې‌وزلۍ له امله تر یو ملیون اوښتی او دا شمېر په زیاتېدو دی.

د طالبانو حکومت یوه ویاند ذبیح‌الله مجاهد مشال رېډيو ته ویلي، دوی د یونېسف په ګډون له هغو مؤسسو سره چې د ماشومانو برخه کې فعالیت کوي په اړیکه کې دي او هڅه کوي د ماشومانو اړوند پروګرامونه په سمه توګه پیل او ښه مدیریت شي.

مجاهد ونه‌ویل چې له لوږې او بې‌وزلۍ د ماشومانو د خوندیتوب لپاره دوی څه پروګرام لري.

بل‌خوا تېره میاشت سېف د چلډرن مؤسسې ازادي راډیو ته ویلي و، په افغانستان کې نږدې پنځه ملیونه ماشومان له لوږې سره مخ دي.

XS
SM
MD
LG