د پاکستان د بهرنیو چارو وزیر وايي، په کییف کې د پاکستان له سفارتخانې سره په مسلسل رابطه کې دي څو په اوکراین کې ګېرو د پاکستانيو زده کوونکو خوندیتوب یقیني کړي.
شاه محمود قریشي د فبرورۍ پر ۲۵مه په اسلام اباد کې یوه خبري غونډه کې وویل، په کییف کې سفارتخانه یې یو بل ښار ترنوپل ته منتقله کړې ده چې د پولینډ له پولې سره نږدې او نسبتاً محفوظه سیمه ده.
نوموړي وویل چې په اوکراین کې شاوخوا ۳۰۰۰ پاکستاني زده کوونکي دي نو د ګېرو زده کوونکو په خوندي ډول د را ویستلو په خاطر یې د سفارتخانې د منتقلولو پرېکړه کړې څو په راویستلو کې یې اساني وي.
په عین حال کې په اوکراین کې د پاکستان سفارتخانې د فبرورۍ پر ۲۵مه، پر ټویټر پاڼه لیکلي چې په لوویف ریلوې سټیشن کې یې د زده کوونکو لپاره مرکزي ځای جوړ کړی دی او د تماس یوه ټیليفوني شمېره یې هم ورکړې ده.
په بیان کې لیکل شوي چې زده کوونکي به پولینډ ته منتقلوي. د سفارتخانې په وینا، وار له مخه ۳۵ پاکستاني زده کوونکي پولینډ ته منتقل کړل شوي دي.
دا په داسې حال کې ده چې پر اوکراین باندې د روسي ځواکونو له یرغل وروسته د اوکراین په مختلفو ښارونو کې د طب پاکستاني زده کوونکو د فبرورۍ پر ۲۵مه مشال رېډيو ته وویل چې هلته بې اسرې پاتې دي او له حکومته اپیل کوي چې په خوندي ډول د هغوی د راویستو بندوبست دې ورته وکړي.
