پښتون ژغورنې غورځنګ د علي وزیر او نورو غړو خوشي کولو لپاره نن په کوټه کې احتجاجي جلسه کوي.
د کوټې په هاکي میدان کې د رابلل شوې احتجاجي جلسې هدف د پښتون ژغورنې غورځنګ د مخکښ او د جنوبي وزیرستان پارلماني استازي علي وزیر او د غورځنګ د نورو بندي غړو د خوشي کولو غوښتنه ده.
د پښتون ژغورنې غورځنګ مشر منظور پښتین پر دې سربېره جلسې ته رسېدلی چې د بلوچستان حکومت د هغه او یو شمېر نورو غړو پر ورتګ بندیز لګولی دی.
د بلوچستان حکومت وايي دا بندیز یې د امن پر ځای ساتلو لپاره لګولی دی خو منظور پښتین او ملګرو یې د بلوچستان حکومت دا ګام ناقانونه بللی دی.
منظور پښتین تر دې وړاندې هم دوه ځله پر بندیز سربېره د بلوچستان پښتون مېشتو سیمو ته تللی دی.
نوموړي د نومبر پر اتمه د احتجاجي لړۍ اعلان کړی وو او دا جلسه د هغې لړۍ برخه ده.
منظور پښتین د فېسبوک له لارې په هغه وينا کې ویلي وو چې د علي وزير، حنيف پښتين، اوېس ابدال، فهيم او رحمت شاه د خوشې کولو لپاره به په کوټه، ټانک او کراچۍ کې جلسې او لاريونونه کوي.
پښتون ژغورنې غورځنګ په دې لړ کې د نومبر پر ۱۴مه په کراچۍ، پېښور او کوټه کې لويې احتجاجي مظاهرې وکړې.
دوی د پاکستان له حکومته غوښتنه وکړه چې د قامي اسمبلۍ غړي علي وزیر په ګډون د غورځنګ ټول نيول شوي غړي او پلویان دې ژر تر ژره خوشې کړل شي.
په دې مظاهرو کې د عوامي نيشنل ګوند او پښتونخوا ملي عوامي ګوند غړي او یو شمېر مخکښان هم شامل وو.
د منظور پښین له اعلان کړې لړۍ سره سم به په کوټه کې نومبر پر ۲۸مه تر مرکزي جلسه وروسته د دسمبر پر ۵مه نېټه په ټانک او د دسمبر پر ۱۹مه نېټه په کراچۍ کې احتجاجي جلسې کېږي.
تر هغه وروسته به پښتون ژغورنې غورځنګ د دسمبر پر ۲۶مه د سيند اسمبلۍ مخې ته احتجاجي پرلت وهي.
د غورځنګ مشر منظور پښتین اعلان کړی چې که د هغه پرلت پر مهال په لس ورځو کې علي وزیر او د غورځنګ نور غړي خوشي نه شول نو به له کراچۍ د بلوچستان پر لور او له هغه ځایه د خیبر پښتونخوا له لارې د اسلام اباد پر لور اوږد لاریون پیلوي.
علي وزير د ۲۰۲۰ز کال د دسمبر پر ۱۶مه پوليسو نيولی وو او د هغه پرضد د پروسږ کال د دسمبر پر ۶مه د کراچۍ په سهراب ګوټ جلسه کې پوليس تور پورې کوي چې د رياست او ریاستي ادارو پرضد يي ويناکړې وه خو پښتون ژغورنې غورځنګ د پوليسو دغه تورونه بيا بيا رد کړي او وايي چې دوی له قانونې او پرامنه لارې د پښتنو حقونه غواړي.
