طالبان وايي، دوی به په افغانستان کې د داعش د ملګرې ډلې او نورو سختدریځه ډلو پرضد په مبارزه کې له امريکا سره همکاري و نه کړي.
د طالبانو د سياسي دفتر وياند سهيل شاهين د اکتوبر پر نهمه له اسوشییېټېډ پرېس اژانس سره په خبرو کې اسلامي دولت وسله واله ډله د داعش په نامه ياده کړه او ویې ويل چې دوی خپله د داعش پرضد د مبارزې وړتیا لري.
د امريکا او طالبانو لوړ پورو استازو د اکتوبر پر نهمه د قطر پلازمېنه دوحه کې خبرې پیل کړې چې د اکتوبر پر ۱۰مه به هم دوام لري.
دا د دواړو لوریو ترمینځ له افغانستانه د بهرنیو پوځيانو تر وتلو او د طالبانو تر واکمنېدو وروسته لومړۍ مخامخ خبرې دي.
امريکايي چارواکو د دې پیل شوو خبرو اترو په اړه څه معلومات نه دي په ډاګه کړي.
خو د خبرو تر پیل وړاندې دواړو غاړو پخلی کړی وو چې په دې لیدو کتو کې به د نړیوالو ترهګرو ډلو د فعالیتونو د مخنیوي او له افغانستانه د بهرنیو وګړو او هغو افغانانو د وتلو په اړه خبرې کوي چې غواړي له دې هېواده ووځي.
د طالبانو ویاند سهیل شاهین اسوشیتیدپریس خبري اژانس ته ویلي وو چې په دې خبرو کې به د طالبانو او امریکا ترمنځ د ۲۰۲۰ کال د سولې تړون ته بیا کتنه هم وشي.
یو امریکايي چارواکي د نوم نه ښودلو په شرط اسوشیټیډ پریس ته ویلي چې امریکايي استازي به په دې خبرو کې طالب مشران پر هغو ژمنو عمل ته وهڅوي چې د سولې په تړون کې یې کړې وې.
د اسلامي دولت خراسان ډلې پر افغانستان د طالبانو له واکمنۍ راهیسې د هغوی مشران او نور خلک په نښه کړي او د خونړیو بريدونو ذمه وارۍ يې هم منلې دي.
اسلامي دولت خراسان وسله والې ډلې په کندوز کې د اکتوبر پر اتمه د شیعه ګانو پر جومات د ځانمرګې بريد ذمه واري منلې وه.
په هغه بريد کې تر ۱۰۰ زياتو کسانو ته مرګ ژوبله اوښتې وه.
په دوحې کې د طالبانو او امریکا استازو ویلي چې په مهمو مسلو کې د افراطي ډلو پرضد عمليات شامل دي.
همداراز، امريکا پر طالبانو فشار راوړی چې د بهرنیو وګړو او د هغو افغانانو په اېستلو کې خنډونه جوړ نه کړي چې هېواد پرېښوول غواړي.
د امريکا بهرنيو چارو وزارت وايې له طالبانو سره د امريکايې پلاوي ملاقات دا نه ښيې چې امريکا په افغانستان کې د طالبانو واکمني په رسميت پېژني.
