د امریکا دفاع وزارت سرپرست وزیر د افغانستان له ولسمشر سره په هېواد کې د دایمي اوربند پر ټینګښت خبرې وکړې.
په افغانستان کې د دایمي اوربند د ټینګښت امکان، د تاوتریخوالي زیاتېدل او د افغان امنیتي ځواکونو د ملاتړ دوام، د دواړه مشرانو د بحث عمده موضوعات وو.
د امریکا د دفاع سرپرست وزیر کریس میلر د ډېسېمبر پر ۲۲مه مازیګر له ولسمشر محمد اشرف غني سره په ارګ کې خبرې وکړې.
د جمهوري ریاست مرستیال ویاند، دوا خان مینه پال مشال راډیو ته نور معلومات ورکړل.
هغه زياتوي: "د امریکا د دفاع سرپرست وزیر په افغانستان کې د تاوتریخوالي پر زیاتېدو اندېښنه وښوده او دواړو لوریو د تلپاتي اوربند پر ټینګښت ټینګار وکړ. د امریکا د دفاع وزارت سرپرست زیاته کړه، د امریکا د افغانستان په ځانګړي ډول د افغان امنیتي او دفاعي ځواکونو د ملاتړ په برخه کې دوامداره ژمنتیا لري."
په دې کتنته کې له طالبانو سره د سولې د مذاکرو په اړه هم بحث وشو، چې د سپټمپر پر ۱۲مه په قطر کې پیل شوي او اوس د ۲۰ ورځو لپاره په کې وقفه راغلې ده.
د امریکا دفاع وزارت د ډېسېمبر پر ۲۲مه په یوه اعلامیه کې وویل، دغه سفر د امنیتي دلایلو له مخې له وړاندې نه و اعلان شوی.
د امریکا د دفاع سرپرست وزیر په افغانستان کې د بهرنیو ځواکونو له عمومي قوماندان جنرال سکاټ مېلر سره هم په ټوله کې د افغانستان پر عمومي وضعیت، د ټروریزم ضد عملیاتو، د افغان ځواکونو د روزنې، سلا مشورې او همکاري پر موضوع بحث کړی دی.
دواړو امریکايي مقاماتو د طالبانو له خوا د تاوتریخوالي د زیاتېدو تر څنګ له افغانستانه د امریکايي پوځیانو د شمېر د کمولو په اړه هم بحث کړی دی.
که څه هم په قطر کې د طالبانو مذاکره کوونکي د دولت له مذاکره کوونکي پلاوي سره درې میاشتې په مذاکرو بوخت وو، په دې موده کې هم په افغانستان کې د دوی تاوتریخوالی کم نه شو.
امریکايي چارواکو په وروستیو کې اعلان کړی، چې د جنورۍ میاشتې تر نیمايي پورې به په افغانستان کې د امریکايي پوځیانو شمېر له ۴۵۰۰ څخه ۲۵۰۰ ته راکم شي.
د فېسبوک تبصرې